高追易中招
2017年02月22日
港股升上兩萬四千點後，出現預期嘅調整，借住大笨象業績差過預期，大市向下插咗兩百點。睇番周一大市交投減少，北水流入少咗，就算大笨象業績對辦，個市都可能難逃一調。
滙控績差股價急插
滙控(005) 中午就公佈業績，去年第四季，列帳基準除稅
前業績虧損擴大至34.45億美元，市場原本估計可以由虧轉盈；2015年同期則蝕近8.6億美元。期內，經調整稅前盈利26.2億美元，按年升39%，2015年同期虧損近10億美元。集團去年淨息差1.73%，按年收窄15個點子，主要受英國按揭市場定市場競爭，以及出售巴西資產等影響。講到前景，集團就預計將受惠加息，估計若今年每季加息25點子，將令今年淨利息收入上升17億美元。
業績公佈後，大行普遍睇淡，高盛認為佢主要受長期債務收益差強人意，以及來自利率掉期的影響，雖維持予滙控「買入」評級，但將目標價由74元調低至72元。滙控(005) 去年業績較預期遜色，股價在本港跌5%，收市跌65.55元，在倫敦進一下跌逾6%，報6.687英鎊，創2015年8月後最大跌幅。同系嘅恒生銀行(011) 因為無咗特殊收益，股東應得溢利減少41%，至162億元，每股盈利減少42%，至8.3元，第四次中期息每股2.8元，股價收市升0.12%，報163.3元。大笨象股價係績前飊上近年高位，本來已經有回吐壓力，稍有差池都要跌一跌，而家被人話佢業績差過預期，即時被人大插，我近日經常提大家唔好急追，就係唔想遇到呢種狀況。
市場關注嘅回購安排，董事會就決定添食多10億美元，預期將於2017年上半年完成。這使成功出售巴西業務後，自2016年下半年以來宣佈的股份回購增至35億美元。不過，今年上半年的回購金額，遠低於去年下半年的25億美元。市場認為呢個數字縮咗水，但陸羽仁認為銀行業有鬆綁機會，理論上唔一定要回購，因為做生意環境若好番，咁不如留番啲資金去錢搵錢。董事會唔即刻叫停，可能都係因為唔想一下子煞車咁掃興，唔好忘記嘅係，滙控買番嚟嘅股份唔係註銷咗，啱價佢係會沽番出市場，所以佢回購都要考慮股價，掉轉頭睇，佢之前買嘅股價而家就已經叫做賺咗。
滙控業績出乎意料咁唔靚仔，搞到成個市畀佢帶頭向下，失守24000關，恒指最多跌236點，全日跌182點，國企指數收報10408，跌36點，成交金額877億元，好明顯入市資金唔多。強勢嘅銀行股回軟，輪到落後嘅地產股撐場，新地(016) 升3%，報111.7元；恒地(012) 升1.4%，報44.6元；會德豐(020) 升1.1%，報48.8元。另外，煤炭股造好，MONGOL MINING(975) 升15%，報0.28元；同仁資源(8186) 升14%，報0.41元。
友邦窒醫生股價撐得住
友邦保險(1299) 早前向私家醫生發信指，只會批出「醫療所需」的賠償，包括全身麻醉、要用到只有醫院才有的醫療設備或七種重疾及五種急症。友邦咁出招搞到醫生組織好不滿，質疑保險公司施壓，教醫生做嘢。
保險公司咁打開口牌，多少有慳水味道。有中環茶友話，買得保險當然想享受好嘅賠償條件，但羊毛出在羊身上，大家睇到而家醫療費用持續急升，郁吓都幾十萬銀埋單，醫生唔畀其他地方嘅專才嚟搵食，佢哋自己就做晒星球人、月球人，保險公司唔出聲，病人組織又無牙力，根本係畀佢哋㩒住收錢，郁啲就話人影響專業，講真，保險公司有大把資源做監控，佢都識得搵醫生睇吓啲醫療方案係咪合理，抑或有人搞出不必要嘅收費，所以呢次至少各打五十板， 醫生都要好好反省下。唔知係咪咁，友邦股份一度逆市上升，收市就微跌0.1%，收49.05元，都仲跑贏大市。
陸羽仁
金融High Tea 舊文
來源 source: http://hdfin.stheadline.com
