一路一帶：
香港法治隨建華「肖肖」的走了
■蕭建華（肖建華）被挾回內地。 《壹週刊》圖片
踏入雞年，先向各位讀者講句恭喜發財。由於一男子仍然在任，即使到雞年，香港荒謬事仍不斷發生，內地「明天系」大佬，「被軟禁」中環四季酒店嘅蕭建華（肖建華），年三十晚被「坐洗頭艇」，返大陸「休養生息」。
今次蕭建華有傳係黑幫收錢幫中共挾佢返大陸，今次事件與銅鑼灣書店事件如出一轍，今次絕對唔再係「個別事件」，而係蕭建華其實軟禁咗喺香港，準確啲講，係軟禁在四季酒店同IFC商場，筆者並非第一次在IFC商場撞到蕭建華，他很少離開中環，自李波事件後，有傳佢避走日本，但中共耐性非常好，等你返香港再拉你！
蕭同李波一樣，都係喺號稱最安全嘅城市香港，被綁架走；香港一直是避稅天堂，走資天橋，中共貪汙官員、有錢佬都透過來香港走資，變相買保險為自己及家謀出路，但李波同蕭建華事件，大大力摑了各位一巴，話畀所有大陸人及香港人知，其實喺香港一啲都唔安全，中共喺香港，喺泰國，喺有建交嘅地方，都安裝咗「隨意門」，要嘅人全部走唔甩，亦都間接向全世界講，「一國兩制」已經玩完！要生存？一定要「蚹蛤蟈蜻」。
回顧689任內四年多事件，荒謬事數不完，UGL收5,000萬，到𠵱家仲未有下文，公器私用好似家常便飯。挑戰港人底線到極限，想當年，前財爺梁錦松偷步買車，搞到要下台問責，前特首曾蔭權涉貪案更審緊，其實梁錦松同曾蔭權掀涉嘅事，相比梁振英所犯嘅惡行，真係小巫見大巫，究竟梁振英下台後會點樣被清算？冇人知，但香港一直沉淪落去，受害嘅只係各位不問世事，不食人間煙火嘅香港人。
本欄大膽作「曲到圓」預測，「五十年不變」會進化成「五十年巨變」，將來荒謬事只會更恆常化，大白象工程？繼續起，紅色資本繼續入侵，以往由地產商壟斷的生活必需品，將由大陸接管，中資超市，中資電訊，中資電力，中資煤氣，中資商場，中資物業，統統由港商變成中商，每個港人都幫襯嘅麥當勞都被買起，領滙（823）要成為紅色資本，一啲都唔出奇；至於港幣，應該好快都變成廢紙。
斯郎
https://www.facebook.com/oneroadonebelt/
本欄逢周四刊出
斯郎
~TITLE_S~一路一帶 - 斯郎 2017年2月2日 舊文
來源 source: http://hk.apple.nextmedia.com
