等打交 跌市入
2017年02月02日
美股在總統特朗普猛點火頭下繼續調整，搞到港股復市開唔到紅盤，但正如陸羽仁所料，佢咁搞美元下跌對人仔有利，港股有支持，結果恒生指數低開後真係有承接，收市跌幅明顯收窄，表現其實唔錯。
買鋼鐵股升得和味
外圍股市下跌，加上市場憂慮特朗普將加強對
美國的貿易保護，引發國際貿易戰，恒指農曆年復市後低開148點，一度跌278點，中段跌幅開始收窄，午後進一步收復失地，收報23318點，跌42點；國企指數收報9756點，跌47點，成交金額578億元。
大市雖然偏軟，但市場擔心國際局勢會因特朗普的舉動而轉趨緊張，國際金價向好下，部份金股造好，中金國際(2099) 逆市大升6.5%，報15.7元；招金(1818) 漲2.6%，報7.03元；紫金(2899) 升2.3%，報2.68元。
鋼鐵股繼續有得炒，以溢價配股恢復公眾持股量的中國東方集團(581) 大升47%，報1.71元，其他鋼鐵股亦見資金流入，過年前買咗鋼鐵股者，開年呢封利是都好和味。
特朗普搞事惹反擊，伊朗針對特朗普禁止其國民入境美國，出招反制，計劃棄用美元。伊朗每一財年的石油出口收入大約為410億美元，伊朗央行行長賽義夫表示，伊朗將在外匯交易和財務報告中棄用美元，並選擇一種新的通用貨幣或運用多種外幣組合來代替。佢話美元在伊朗的外匯儲備中是非常微不足道的，所以美元在伊朗的地位應該被伊朗更重要的交易夥伴國，例如阿聯酋、俄羅斯、中國、歐盟等國家和地區的貨幣所代替。伊朗咁反擊，會令回調中的美元再弱少少，對人仔和港股係好事。
對於特朗普辣火頭搞到跌市，陸羽仁話唔需要太悲觀，若然低位可以買吓大股。有中環茶友問如果想低撈，有乜可以留意呢？雞年股市大方向係要密密啄，唔好太大貪，基本上港股藍籌唔係太平，但都唔算好貴，如果回落入貨，大部份大型股都有防守嘅條件，但如果要搵啲穩陣小小嘅板塊，方向之一係買吓中資股，尤其係啲低市盈率或者資產折讓大嘅股份。
中環茶友話，特朗普上台，話明要同中國開波，國家主席習近平都話咗同佢拼幾吓硬嘢，咁仲走去買中資股？我嘅睇法係特朗普高叫美國優先，實情呢個只係舊酒新瓶，試問美國佬幾時唔係大美國主義？幾時唔係美國優先？尤其係中美關係，從來美國佬都唔當中國係真正朋友，大家只係利字當頭先有偈傾，如果美國佬可以郁到中國，一早已經郁咗手啦！奧巴馬、希拉莉政府同特朗普嘅分別，只係一個笑騎騎、放毒蛇，大搞圍堵；一個就未打先嗌，殺聲震天啫。
內資股有息收秤先啲
中國一向同美國處於利益角力狀態，唔係淨係睇大佬心情做人，加上本身有自己嘅財金主導權，所以同其他國家好似墨西哥，甚至美國嘅盟友日本、南韓比，中國嘅自衞能力反而最強，打交時個市會跌，但最後不會死人。
聽完我咁講，咁係咪可以唔理好醜猛買中資股呢？答案梗係唔係啦，皆因特朗普好似狂人揸住機關槍，就算係點好打，俾佢掃中唔死都會傷，所以比較穩陣係等有壞消息插低先買，咁等如打咗折頭入貨，呢啲機會今年可能比過去多，造就密食當三番嘅機會。
O依家好多中資股都係市盈率好低，好似建行(939) 近日略回調，市盈率唔夠6倍，派息有5.6厘，昨日跌市喺5.8元跌唔到落去。其他好似內房股，去年賣樓成績普遍理想，佢哋市盈率低，有啲仲可能會派高息或特別息，呢啲股份就算買咗個市唔就，都叫做有息收當食定心丸囉。
陸羽仁
金融High Tea 舊文
來源 source: http://hdfin.stheadline.com
