中環在線：陪孫滑雪
肥老闆肥得滯齋坐
■張華峰咁有份量嘅身形，滑雪就有啲難度喇。
猴年股市一如馬騮仔咁大上大落，立法會議員（金融服務界）張華峰上年都遇到唔少挑戰，趁過年就同屋企人去日本劄幌滑雪輕鬆嚇。
張華峰噚日出席開市儀式後，話啱啱去完日本，佢自嘲話自己呢種份量嘅身形，又戒唔甩為食
，都係減唔到肥㗎啦，滑雪就冇乜可能，反而兩個乖孫就好快學識，玩得好開心。張華峰就坐雪兜，玩嚇雪咁。除咗滑雪，佢其中一餐食隻3公斤重嘅大蟹，新年有食神！
日日想約林鄭傾偈
講到城中熱話特首選戰，佢即刻呻話，過年前日日想約特首參選人林鄭月娥傾偈，但奶媽日日都話唔得閒，到佢上咗飛機，奶媽就得閒見詹劍崙、東泰主席李君豪為首嘅另一班金融服務界選委。
張華峰話，如果係自己一個人去旅行，當然可以遷就，但呢次家庭旅行，機票酒店假期一早預好，所以遷就唔到，同奶媽無緣傾偈都冇辦法。（奶媽睇到呢度要唔要即刻做嘢呢？）
另一選委詹劍崙就同張華峰啱啱好相反，呢幾日身在印尼峇里過年，一個冰天雪地、一個椰林樹影，兩位好似真係唔多夾！
噚日開市，講番主人家，港交所（388）主席周松崗話自己過年冇去旅行，留港湊孫，加上年初三跑賀歲馬，身兼馬會董事嘅佢又點行得開呢？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
