大棋局 - Mr. Tregunter 2017年2月14日
大棋局：諾貝爾愛情經濟學
■經濟學家用博弈論分析追女仔、搵男友方法，結果拎埋諾貝爾經濟學獎。
佛家有句話：前世五百次回眸，換來今世的擦肩而過。茫茫人海之中相遇是緣份，但你揀人，人揀你，點樣喺各有所選嘅情況下取得優勢？經濟學家用博弈論分析追女仔、搵男友方法，結果拎埋諾貝爾經濟學獎。
經濟學家沙普利（Lloyd Shapley）建構一套Gale-Shapley演算法分析各種配對。比如有3男甲、乙、丙，3女A、B、C，各人可揀一個首選及一個次選。當中甲及A條件最好，都屬眾人首選；乙次選B，丙次選C；但B次選丙，C次選乙。配對後結果會點？
甲及A唔使講嘢，一拍即合，因兩人都係彼此首選。餘下4人則要競爭，呢個時候Gale-Shapley演算法上場。若由男方主動，配對出現1A、2B、3C結果嘅機會較大；若由女方主動，則出現A1、3B、2C結果嘅機會較大。呢到假設男方主動時，女方唔會主動去配對一半，反之亦然。其演算方式旨在說明，當你揀人、人揀你時，主動方比較佔優。當然現實唔係咁簡單，否則電視台都唔會晚晚播四角戀劇情。
今日好多新名詞，如剩女、剩男、草食男、敗犬女，多到搞唔清講乜。年輕一代選擇單身，過去冇咁多，或者係以前嘅人比較簡單。去燒臘舖買叉燒，見到叉燒佬老婆幫佢入袋，你赫然發現此為將要絕跡嘅奇景。因為今日如果有個後生仔話佢做叉燒佬，女嘅聽到已走咗去；有個後生女話自己做街市婆，男嘅聽到可能又走咗去。
情況就好似炒期權，bid唔到價唔買，ask唔到價唔賣，結果擘價冇成交。現代剩女、剩男現象就係擘價現象。或許我哋考慮太多，但遺忘咗原來最簡單嘅本質，不妨趁今日回眸你身邊嘅人。最後借完顏亮一首《昭君怨‧雪》作結：
昨日樵村漁浦，今日瓊川銀渚。山色捲簾看，老峰巒。
錦帳美人貪睡，不覺天孫剪水。驚問是楊花？是蘆花？
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.apple.nextmedia.com
