【實力取勝】財經界吳卓羲 股壇張敬軒雲集策略王（陳承龍）（第116期）
2017-3-16 16:00:14
早幾日飛咗去日本輕井澤，去出席我哋策略王首席智囊李鴻彥嘅婚禮，場面相當感人。我與李鴻彥已經相識超過20年，我哋由大學識到依家，睇住對方長大，睇住對方不斷轉變，以前我覺得
李鴻彥做人做事好執著，有時執著得嚟有啲老土，不過隨著人年紀越大，開始冇咁執著，會多聽人意見。
當然，李鴻彥有佢好多過人之處，例如做傳媒咁多年，總會諗到一啲好有質素嘅問題去質個被訪者，另外佢外貌俊朗，又夠高大，所以除咗被訪者認得佢（呢點好重要，因被訪者認得佢，再約下次訪問就易好多），聽講好多女行家都對李鴻彥好有興趣，仲話佢似吳卓羲添，不過依家冇機會啦⋯⋯但講到尾，李鴻彥成家立室後，要再畀心機幫我搞好策略王。
除咗財經界吳卓羲外，原來都有股壇張敬軒。話說小弟唔喺香港呢幾日，但我又唔想冇咗直播，所以小弟決定叫喺新城做過《散戶奇兵》嘅陳栢運頂我做節目。事實上，我未聽過佢做節目，不過，以我平時觀察，呢條仔都ok，做嘢幾有交帶，所以搵佢幫嚇手做節目。我喺日本都睇咗佢一陣做節目，ok喎⋯⋯有板有眼，樓下幾多正評，好多人讚，仲有人夠膽死話佢係股壇張敬軒！講真，個衰仔個樣又幾OK，我見劉慧同佢做節目個樣開心過同我做。
其實陳栢運除咗靚仔之外，做嘢都OK，佢分析股票都幾到位，平時我哋周刊嘅好多故事，都係出自佢手筆，所以以後啲股票唔得要搵人找晦氣嘅話可以直接搵陳栢運。
其實策略王都幾勁，有吳卓羲、張敬軒，當然仲有黎明啦⋯⋯
講返個市，呢篇文出街之時，美國應該都加咗息，個市應該反映曬加息因素，所以我覺得個市應該有得升。心水方面，上周介紹嘅雅居樂（03383.HK）都幾好，今期都係睇返啲內房，其中可留意花樣年（01777.HK）。
內房股已成為近期主角，兩會更已搞清楚咗不同城市、採取不同樓市政策方向，市場盡消憂慮，整體政策信息正面，加上舊年第4季開始內房勁賣，為內房股升勢打咗個鋼底！搵內房對象，最緊要槓桿夠大及爆升勢頭夠勁，隻花樣年合曬條件，首先係NAV高達2.38元，即係市帳率僅0.5倍幾，已係場中最抵玩！
花旗近期貼內房股中到開巷，佢最新就為花樣年訂出高達3.05元的目標，較現價高出1倍半！另外2013年，已經上曬岸的TCL集團，透過注入物業換取花樣年8.64億新股，每股作價1.41元，又係好有參考價值。花樣年處剛起動階段，最少到1.6元先有較大阻力，但仍距2.38元NAV遙遠，相信好快追到龍頭內房之位。
實力取勝 - 陳承龍 舊文
來源 source: http://www.winmoney.hk
