【知魚之樂】唔怕唔識升 最怕追唔切（唐牛）（MAR 21）
2017-3-20 18:01:18
同胞炒股有幾癲？你睇美圖秀秀（01357.HK）就知，10日升一倍有多，然後單日再由高位調整三成，牛市熊市一日完成，基本因素無變下，竟然有如此波幅，心血少啲都出事。
另一邊廂，香港人
搶樓亦不遑多讓，剛過去周六日，三個新盤狂賣千夥，發展商累積套現逾百億銀。新財爺陳茂波喺網誌話，樓市風險逐漸增大，情況令人擔心，故此現階段看不到有條件「減辣」或「撤招」。
簡單經濟學都有教，市場價格由供求釐定，辣招令市場供應扭曲，結果成為樓價越升越有嘅元兇之一，不撤招更會令加強市民對樓價只升不跌嘅期望，你可以話政府正在買時間，等待新供應才撤辣，但到時樓價會升成點，實在難以想像，開講有話「升得越高跌得越痛」，香港人只能自求多福。
聽到心跳加速？今日推介中糧控股（00606.HK），等你舒舒服服贏錢吧。中糧控股主打糧油食品，包括油籽加工、生化及生物燃料、大米加工及貿易、小麥加工、啤酒原料等，雖然唔係近期熱炒題材，但相信好快會落鑊。
點解咁有信心？第一，中糧月底將會公佈業績，由於已發盈喜，成績表靚靚幾無懸念；第二，中糧控股阿媽中糧集團乃央企改革試點之一，乃炒注資混改佳品。中短線炒作概念齊曬，睇圖已橫行一段時間，唔怕唔識升，只怕一起動追唔切咋！
#知魚之樂 #唐牛
【只要用心，人人都可以係股神！】
https://www.facebook.com/tongcow88
知魚之樂 - 唐牛 舊文
來源 source: http://www.winmoney.hk
