中環在線：海航31億買福布斯？
■新一期褔布斯雜誌。 互聯網
中國土豪鍾意四周圍買嘢是常識吧！講緊嘅係近月喺香港瘋狂掃地（地皮個地）而為港人認識嘅海航集團，噚日又傳出海航集團手痕要買嘢，而且唔係傳佢哋買一樣，而係一日裏面傳佢哋買3樣唔同嘅嘢。
先喺上午傳出海航集團正尋求收購瑞士機場
零售商Dufry AG嘅部份股權，中午又俾外電爆出佢哋正傾緊收購福布斯傳媒（Forbes Media）嘅控股股權，並已搵咗揸住福布斯傳媒95%股權嘅本匯鯨傾咗幾個星期，連交易規模最少4億美元（約31億港元）都有埋，到下午，又傳出佢哋同另一中資公司復星集團競購外國保險公司。
任德章話無意賣盤
根據彭博早前統計，舊年海航至今最少使咗300億美金四周圍濕平，就連經營環境公認艱難嘅傳媒業佢哋都有興趣，之前已經用咗880萬人仔買咗運營《財經》雜誌網站嘅公司80%股份，不過傳嘅褔布斯冇耐前先由股壇猛人任德章拍華碩創辦人謝偉琦聯手買入，唔通咁快又要轉手套現？
消息人就話，福布斯嘅新股東無意賣盤，不過就透露近幾個月真係有唔少投資者主動「拍門」洽購，新股東亦唔會排除為福布斯引入投資者或合作夥伴，咁講法，海航做埋福布斯股東真係唔出奇。又係老問題，點解海航咁有錢嘅？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
