智取大市：
下一季簡單策略
■近期強勢板塊是科網濠賭股。 資料圖片
3月將完，以月線圖睇，恒指由舊年2月低位18278點至今，首次向上觸及保歷加通道上軸（24576點），根據往績，未來數月出現整固機會大。表現同恒指掛鈎嘅股份，估計喺未來數月冇乜表現，好則chok住打橫行，衰則大幅下跌
，資金頗大可能從呢類股流走，傳統中資股暫時唔建議持有。
根據上述情況，其後可發展成兩種劇本，第一種，整體股份顯著下跌，直至一個長線吸引水平引資金低撈，然後重拾升軌；第二種，恒指跌幅唔多，資金繼續由傳統股份流進少數強勢板塊，而近期咁啱強勢板塊同2013年尾、2014年頭差唔多，都係科網濠賭股。而美股市場之內，納指近期亦跑贏道指，蘋果、亞馬遜破頂，微軟亦醞釀破頂之勢，睇得出環球資金近期嘅品味如何。未來幾個月，科網或許係賺錢嘅希望所在。
3月中講過，舜宇（2382）MACD波幅擴大，呈擴散三角形，傳統技術分析認為係大跌浪前見頂先兆，但呢種形態出現於大價股，一係牛三、一係股王，股價例牌等MACD破頂才會見頂。呢類超強勢股捧場者眾，因此少技術陷阱，大成交突破就係追入訊號，雖未出現但值得等。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
