遇內資抽水只宜剝花生
2017年03月31日
英國啟動脫歐程序，暫時見唔到有大風浪，但全球投資氣氛略見緊張，喺缺乏好消息下，港股昨在期指結算日偏軟。恒指上咗兩萬四樓上，多咗公司集資，其中包括海航屬下嘅香港國際建設(687) ，佢投得兩幅啟德住宅地後，供股集資逾90億元。香港國際建設
計劃按1供2，每股作價4.08元，較星期二收市價有1%溢價，所得用以支付部份啟德兩幅地皮的價格同作為營運資金，持有66.64%股權之控股股東已承諾包銷。
海航近年在港投地進取，近期佢哋投到4幅啟德地，除了兩幅是通過香港國際建投入標外，還有兩幅是以海航名義入標，4幅地合共涉資逾270億元，令海航成為區內大地主。
海航冀谷大上市公司
今次供股有人形容為撲水投地，外界有此印象相信源於先前個投地價嚇咗港人一跳，當時仲有啲測量師認為佢計錯價，估佢會撻訂止蝕了事。結果呢個想法錯咗，海航繼續用天價不斷投地，成為區內最大地主。呢次佢供股俾人話撲水，但睇番大股東係自己包銷，咁即係話小股東唔供佢就供埋，預咗要上身，咁樣做事先應該整定水喉，預備隨時自己全數泵水；加上今次佢供股比例大而無折讓，股數1變3，而且用溢價供股，供完股市值亦都1變3，由現時44.7億大增到134億，似乎佢係想谷大公司市值規模，多過喺市場抽水喎。
睇番海航集團營運，近年佢喺融資市場活動頻繁，不斷喺中國用股票或債券融資，同時在海外四出收購，來香港買地只係其中之一，好似早兩日傳聞海航集團正洽購外國媒體《《福布斯》》的控股權，其後海航回應指對交易不知情。好似呢種收購規模對佢來說只係小菜一碟，有中環茶友坦言，內資嘅財技，本地股民就好難睇得明，穩陣計當然係剝花生，要投機都唔好瞓身，行埋去易傷身。
海航喺啟德高價搶地，首先就益咗本地發展商可以高價賣樓。根據代理界計數，首季賣樓最多係新地(016) ，粗略計有130億元以上，跟住係會德豐(020) 、新世界(017) ，當中新世界賣樓差不多已等如全年數字。會德豐股價昨日再升2%，創出62.7元新高。下季賣樓多嘅會係長實(1113) ，恒基(012) 都會有兩個市區盤。自從花旗話個個星期五政府都有可能加辣出招，嚇一嚇大家，相信發展商都會早賣早着，因為萬一加辣就好難賣。
講番個市，恒指全日偏軟，昨日收報24301點，跌90點；國企指數收報10355點，跌81點，成交金額731億元。藍籌中濠賭股繼續有追捧，銀娛(027) 升0.8%，收報43.1元。
三桶油中石化最靚仔
收市後中石油(857) 公佈業績，去年盈利78.6億元人民幣，按年大跌約78%，但比去年第三季大跌90%已有改善。每股基本盈利0.04元，為回報股東，按去年下半年盈利的45%，派末期息每股1.801分；另派末期特別息每股2分人民幣，合共3.801分人民幣。中石油股價喺績前回吐，部份反映咗盈利下跌因素，現時「三桶油」派晒成績表，暫時以中石化(386) 表現最好，如油價維持呢個水平，相信佢會繼續有較佳表現。
今個星期有多隻新股掛牌，新加坡承建商SHIS(1647) 掛牌，開市價0.63元，其後逐步回升，高見1.01元。全日收報0.97元，較招股價升38.57%，成交4.99億股，涉資4.03億元。中國園林建築設計承包商滄海控股(2017) 今日掛牌，昨日暗盤開市報2.27元，較招股價2.17元升5%。另一隻經營自來水及污水處理業務的興瀘水務(2281) 同於今日掛牌，昨日其暗盤開市價2.3元，與招股價相若。
陸羽仁
金融High Tea 舊文
來源 source: http://hdfin.stheadline.com
