財金冒險號：人工智能趕絕基金經理？
■畢菲特2007年同對沖基金公司打賭，標普500指數基金可跑贏對沖基金。 資料圖片
人工智能發展一日千里，只講數據、機率嘅工作如捉棋，人腦已輸俾電腦。科技巨頭正研發無人駕駛汽車，即係電腦連臨場應變都勝任。電腦仍不及人腦嘅，只剩創意。偏偏投資著重
數據、唔講創意（除咗搞財技），所以小生間中同行家戲言：基金經理同分析員就快無得撈。
全球最大資產管理公司貝萊德宣佈，將多隻主動型股票基金下架，炒咗最少7個基金經理，改為電腦程式利用大數據選股。主動型基金業務萎縮，已非新聞，主要因為指數基金盛行。「股神」畢菲特2007年同對沖基金公司Protégé Partners打賭，標普500指數基金可跑贏對沖基金，經過九年，指數基金升85%，Protégé揀嘅五隻對沖基金全部跑輸，平均只升22%，股神贏硬。
小生上年都寫過篇〈散戶都可做李城〉（https://goo.gl/fdzy71），結論係「現時資訊唾手可得，基金優勢漸失，不如聽畢菲特教路買指數基金」。今日反而想為主動型基金辯護：指數基金雖好，但股神咁樣同對沖基金比並唔恰當，應該同主動管理、目標跑贏同一指數的基金比較。咁主動基金係咪多數跑輸大市？係，如果只睇成熟市場大型股。但小型股以及新興市場較少人覆蓋，優秀嘅基金經理較易搵到滄海遺珠，跑贏指數嘅基金都仲有唔少。
利申：小生並非從事基金，無利益衝突。
笑笑生
mailto:sneeringman@gmail.com
笑笑生
財金冒險號 - 笑笑生 舊文
來源 source: http://hk.apple.nextmedia.com
