中環在線：
Fit馬話同林鄭唔啱步伐
■馬時亨（右）噚日去咗花旗財經新聞獎頒獎典禮；旁為主持人彭晴。
呢輪個個中環人行埋一齊，必定八卦邊個可能加入下屆政府個熱廚房。噚日咁啱有港鐵（066）主席馬時亨、教育大學校長張仁良、中大商學院院長陳家樂（財庫局局長陳家強細佬）同場，Fit馬就好
似食咗誠實豆沙包咁話，「根本冇人接觸我」！
「都冇人接觸我」
噚日花旗舉行財經新聞獎頒獎典禮，上述幾位仁兄都係評判。Fit馬以前係財金官員，又係少數面面俱圓、公關手段高明嘅高官，無論顏值定經驗值都開正𠵱家政府最欠缺嗰瓣，好多人都覺得佢一定被人羅致。
點知佢被主持人問多兩問，竟然講真話：「根本都冇人接觸我！」冇Connect喎。
Fit馬講起林鄭呢位舊同事亦好特別，佢話：「佢（林鄭）做嘢好認真，點會有趣事？」又話當年自己管商務局，林鄭管發展局，「兩個都唔同跑道，點會步伐一致？我搭飛機多、佢行路多」。而且，佢「冇受過消防員訓練」，入熱廚房都係唔好預佢嘞。
教大校長張仁良都避唔開呢個話題，佢話，做得大學校長，有義務畀意見政府。大學合約2018年完結，有冇機會要改口叫局長司長咁？張仁良就含蓄咁話，畀咗意見，希望佢哋搵到個更合適嘅人喇，又賣定口乖，叫就快上任教大校董會主席嘅Fit馬，手下留情，唔好炒佢魷魚。陳家樂被問到阿哥陳家強會唔會留任政府，就十問九「唔知」。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
