手鬆派息最實際
2017年04月11日
中美兩國元首會面平靜無波，但外圍持續發生恐襲，加上美國軍艦在亞洲想加強對北韓施壓，投資市場係業績高峰期後缺乏好消息推進。北京決定開發新區雄安繼續成為股市題材，不過，內地對呢個概念嘅興趣大啲，本地投資者成熟啲，對相關概念股票經過一輪急升，唔敢隨便
追入。內地以規劃作為發展主導，中央有咗藍圖，國家開發銀行話咁快就召開會議，部署支持雄安新區建設的具體舉措。國開行董事長胡懷邦係會上指出，總行成立雄安新區規劃建設領導小組，對重大事項和項目進行專項研究和調度；及時提供規劃貸款，並制定相應的配套融資規劃；為新區徵地、拆遷、安置等起步階段提供融資。
係消息推動下，雖然內地股市周初低開，大市全日偏軟，滬深指數偏軟下，雄安新區概念股強勢依舊，板塊整體漲幅超7%，金隅A股(601992)、冀東水泥(401) 等25間公司漲停，其中有23間公司連續4個交易日漲停。金隅(2009) H股收報4.76元，跟升咗3.5%。
內險股頂得住震盪
保監主席項俊波受查，中保監昨晚緊急通知，各地保監局局長可繼續參加中保監幹部大會，各保險公司、各地保監局一把手均會悉數出席，可能唔少人驚上咗去開會後返唔到屋企。我話唔個係追究2015年股災責任的大風暴，一行三會中，三會主席唔係換人就係中招，下一波人民銀行都似會換人，習主席清洗金融系統，絕不手軟。金融大鱷和險資在內地股市興風作浪的日子，已成過去。
內險股震盪暫時唔算太大，國壽(2628) 跌1%，報23.3元；中國平安(2318) 收跌0.8%，收報42.5元，內險股近月都唔係幾精神，唔排除都係聞到呢單嘢。
中環茶友話，遇著呢種情況，通常國企股俾人嘅信心會大啲，因為有乜衰嘢，都係鐵打的衙門、流水的官，國家持有嘅企業，點都會有人頂住唔會衰晒，民企你就唔好掂啦。
恒指全日高低波幅只有99點，收報24262，跌5點；國企指數收報10253，下跌20點，成交金額651億元。汽車股幾乎全線向下，吉利汽車(175) 上月銷量按月跌2%，遜市場預期，股價跌4.9%收報10.5元，為全日表現最差的藍籌股。汽車股幾乎全線向下。
路勁系投貴地照炒升
舜宇光學(2382) 股價一度爆升上55.3元，收報53.9元，升咗0.5元，公司公佈3月光學零件出貨量為4754.1萬件，其中，手機鏡頭出貨量按年升54.8%至4029.9萬件，車載鏡頭出貨量按年上升59.9%至258.6萬件。光電產品出貨量為2386.8萬，其中，手機照相模組出貨量按年升47.1%至2337.2萬件。業績靚仔股價爆上，令佢股價飊到去到41倍嘅市盈率。
除咗雄安概念股好啲外，本港地產股借住呢兩日賣樓好，表現都好過大市。有人留意到早排投咗港鐵地嘅財團成員路勁仲全系起動。路勁嘅旗艦公司其實係惠記(610) ，之下持有經營收費公路同中港房地產嘅路勁(1098) ，同埋專做地基嘅利基(240) ，本身就有美國房地產、建材生意等。惠記去年受惠於屬下兩間上市公司嘅增長帶動，純利 6.7億港元，同比增幅 59%， 每股基本盈利 0.8439港元，公司仲宣派末期股息每股 0.165元(末期息已等如4.8厘)。係業績錯同派息支持下，佢股價由2月份的2.5元升咗差不多四成，昨日收報3.46元，升咗4%。路勁高價回歸買地，係咪睇好見仁見智，惠記作為阿媽全年共派息5.7厘，就吸引咗一班捧場客，顯示有息派始終最實際。
有線傾得密 成敗五五波
有線寬頻(1097) 在有人入股消息刺激下，升咗3.6%，收05.8元，成交唔係好多，只有589萬元，可見投資者都怕佢唔成事。
傾緊入股的是邱達昌的永升，聞說呢一兩日雙方傾得近咗，方向係永升注資入股，九倉保留部份股份，而唔係全盤賣盤。入股後有線寬頻收費電視和免費電視同時做，但有線而家有2100人，有可能要較大幅裁員。
聞說人稱老虎仔的邱達昌計緊數，例如放9、10億入有線，繼續做，比做一個新台投入資金較少，而且即時有收入。壞處時盤生意有既定方向，唔易扭轉，加上向政府承諾投入資金較多，若縮皮要再同政府講數。估計傾得掂機會是五五波。散戶追入要小心風險。
陸羽仁
金融High Tea 舊文
來源 source: http://hdfin.stheadline.com
