【不問價追】馬尼拉．深度遊（二）（小炒王梁心欣）（第122期）
2017-4-27 18:00:43
小炒王求學時期其實好鍾意上歷史堂，因為我喜歡聽故仔，但係往往因為一些人名、時序、地方名一嘢咁對住我衝埋嚟搞到亂鬼曬，掛住記人名地名而搞唔清楚個故仔想講什麼。而我出來做事後
遇到一位高人，其實係我家姐，哈哈，佢教我以後要消化一個故仔先完全唔好理任何時間人物地點！首先要捉實個故事輪廓，明白大綱之後，先返轉頭去記名詞時序，效果簡直有如神助。我出來做事要去消化財經故仔都係咁處理，咁多年都係咁。講番正題今次菲律賓探索投資機遇之旅程，係小炒王近代去旅行感覺最充實最實在學到嘢的一個adventure。
首先，講菲律賓大部份人有兩個感覺。1) 中環賓賓；2)馬尼拉人質事件。大家一諗起呢兩個point就九成人反感繼而唔再研究落去。剩番一成人就因為什麼南沙西沙群島問題、什麼九段線、黃岩島主權問題、聯合國海洋公約等等看似好煩的名詞而唔再研究落去。用番我一貫心法，處理咗個大輪廓先。首先你只須要知菲律賓有一億人的國家先後俾西班牙、美國和日本統治過，西班牙人的管治方式影響菲律賓很深，而美國式的意識形態就散落到菲律賓的每一角落，反而日本對菲律賓影響最小。你細心留意有很多菲律賓人last name係西班牙姓，還有有很多西班牙菲律賓混血兒有很多女仔其實係好靚的！
其次你要知係菲律賓人英文其實係好過你阿媽，佢哋係好虔誠的天主教國家，性格刻苦耐勞。有一千萬個人出國搵食當中（包括十八萬個去咗香港），其餘因為識英文所以世界各地都搵到佢哋影子。嗰一千萬個出國打工的菲律賓人每月滙錢回國畀家人，係菲律賓內需進步中的其中一個原因。第二你要知菲律賓係全球最大的電話服務中心產業基地，佢超越咗印度。最少有150萬人做這行。跟經濟有什麼關係？大佬呀這是製造中產的地方呀！他們識英文，下班後的衣食住行唔係講小的。第三，很多廠已離開大陸去咗菲律賓開生產線。Toyota如是、Physiogel如是、Fuji如是，這些廠的管理層很多是日本韓國和歐洲的知識分子絕對不比香港差。加上又有賭場，雖然博彩收益加規模係澳門十分之一，但我睇到十年內係會有很多很多的日本和韓國人去賭。最緊要係十年內中國人會去菲律賓賭。
國際關係方面菲律賓就係一個年青的訓練班演員。美國就係TVB樂小姐，日本就係PACO，而中國就係facebook朱克伯格。這位訓練班小夥子以前當樂小姐神咁拜。現在開始明白其實再擦佢鞋都只係在TVB紅。這訓練班小夥子現在明白要真紅係要靠facebook。Philippines I am coming。下回再續。
不問價追 - 小炒王梁心欣 舊文
來源 source: http://www.winmoney.hk
