財金冒險號：沙頭角的置業故事
■沙頭角新盤入場價257萬，主打細單位。 資料圖片
2017年5月：我叫阿強，28歲，同家人住東湧、喺東湧返工，女友都係東湧人。最近有篇潮文，講喺東湧拍拖連搞嘢嘅地方都冇，簡直講中曬我嘅心聲。為求「有樓有高潮」，我一直留意樓市，但連東湧上車盤都要四百
幾萬，直至上星期見到沙頭角新盤入場價257萬，忽然覺得生命滿希望。
257萬嘅單位得277呎？唔緊要，我用早排某發展商金句「紫禁城再大，皇帝都係瞓張牀」自我洗腦。樓盤位於禁區，要有沙頭角居民身份至買得？唔緊要。我搵到個沙頭角劏房，月租千八，當係租個迷你倉，咁就得到居民身份。沙頭角去東湧返工，Google Map顯示來回要五個鐘？都唔緊要，發展商話「禁區或在不久將來解除」，到時區內創造成千個職位，唔難轉工。我傾盡全幅身家廿幾萬，借埋發展商二按，成功上車。唔靠父幹、未夠30歲就買到新樓，剎那間由廢青晉身人生勝利組！
兩日後，上女友屋企食飯，故作輕描淡寫地向未來外母自爆買咗樓。我當然無提沙頭角，而係話新界東：「《蘋果》財經作家曾博士都話，新界東係中產新樂園。仲有，特首最近帶團去大灣區考察，我買嗰層樓就食正大灣概念，對住大鵬灣，再遠少少就係大亞灣。」未來外母四萬咁口，夾咗件雞脾我食。
2022年5月：入咗夥三年半，禁區仲未解除，我個屋苑嘅二手成交全部係蝕讓，我唯有自我催眠「自住無所謂、自住無所謂……」
笑笑生
http://fb.com/sneeringman
笑笑生
財金冒險號 - 笑笑生 舊文
來源 source: http://hk.apple.nextmedia.com
