金融High Tea 2017年4月6日
澳門賭場旺大廳
2017年04月06日
港股好淡爭持，個市想跌但跌唔到落去，低位有支持彈番啲上嚟，而且假後成交仲上番千億元㖭。大市昨日照炒兩個原有概念，一個係雄安新區，資金追捧下，前日大漲嘅金隅(2009) 再升逾11%報4.81元；中國宏泰(6166) 升7%報3.74元。
建材股炒吓落後
睇番金隅去年全年業績，股東應佔溢利為 26.9億元人民幣，同比增幅 33%。業績好之餘股價之前未創一年高位4.7元，到昨日先至破咗位，所以呢次有點借住概念炒落後嘅味道，加上交投過去唔係咁多，爆升後沽貨壓力有限，所以連升咗兩日。而家佢升到17倍市盈率，息率不足2厘，以呢類型嘅股份嚟講有小小貴，相信資金追入會開始小心啲。
首批嘅新區概念股炒上咗，市場同步追入建材股，中材(1893) 大漲10%報2.86元。首季港股升得最多嘅板塊係汽車同內房，呢兩個板塊其實都係周期性股份，榮景有個循環，而家去到循環相對高位，估值又貴咗，所以資金停咗手，咁就要搵啲其他嘢炒吓，呢個相信係新區概念同建材股。
另一個概念係濠賭股，永利(1128) 升5.5%報收16.9元；澳博(880) 升5.81%報6.74元；美高梅(2282) 升5.2%報17元；金沙(1928) 收升2.6%報36.95元，落後嘅濠賭股表現又好啲。濠賭股有多少係偷步炒吓復活節長假期消息，上次農曆年澳門生意好爆，去到一房難求嘅地步。
有個澳門富豪話，佢自己開酒店，新年前至愛親朋打嚟想搵房無得應酬，打電話去全澳門最多房嘅猛人諗吓辦法，結果對方竟然都搞唔掂。
澳門富豪話，內地打貪，做貴賓廳生意嘅生意真係跌得好慘，但經過兩年調整，貴賓廳生意仲未回復舊觀，但大堂就開始見番人頭湧湧。做貴賓廳要打折又要放數，盤帳係做得大，但中間好多豬頭骨，而家轉型做吓大堂，捱捱吓都開始適應，所以你見到濠賭股最先見底係做大堂叻嘅銀娛(027) 彈得最先同最多，而家就炒到下一浸。
港股昨假後先軟後揚，主要帶動係來自新區概念，內地股市呢個情況仲明顯。受河北板塊上漲刺激，內地三大股指大幅上漲，滬指4月開門紅，收市漲1.48%，創年內最大單日漲幅。
上證指數收報3270點，升47點；深證成指報10627點，升198點；創業板指報1943點，升35點。整個河北板塊全日爆紅，雄安新區整個板塊強勢漲停，河北板塊內也僅10餘隻個股未漲停。內地分析家都開始心雄，認為在新區概念股帶動下，滬指上攻3300點指日可待。除咗股市，內地黑色商品期貨價格大幅上升，焦煤價格一度升近9%，其他黑色商品價格亦向上，其中鐵礦石價格升近2%，唔排除本地金屬股又會跟炒吓。
A股好友又有啲心雄
係A股咁好氣氛下，港股尾市再拾升勢，而且以全日高位收市，恒指收報24400，升139點；國企指數收報10365，漲50點，成交金額1025億元。係搵落後股炒之下，恒隆地產(101) 一口氣升咗超過4%，報20.7元。
陸羽仁
金融High Tea 舊文
來源 source: http://hdfin.stheadline.com
