異動空間：
全方位收水拆局
■大陸狂印銀紙多年，銀行濫借形成信貸泡沫，家陣要全方位收水。 資料圖片
大陸狂印銀紙多年，銀行濫借形成信貸泡沫，家陣終於要全方位收水，5月M2增速史上最低，人行仲補多句「呢個將會係常態」，即係不會鬆手。印少咗錢之餘，仲要減低現有銀行的槓桿，以免一爆不可收拾
，中銀監叫銀行清查巨企貸款，就係方法之一。
海航、萬達、復星、安邦近年四圍收購，錢從何來？咪又係借。樂觀去諗，信貸危機軟著陸，長遠當然係好事，但短期巨企要「縮表」，唔少項目一定on hold，對盈利總有影響，估值下調也是自然的事。
落場炒開的戰友相信一定同意，個市越來越少股票炒，巨企也被收水，中小型民企的貸款成本必然更高，導致盈利放緩、減慢擴張步伐。嚴打走資，想買殼都唔易。剩番極少數「大到不能倒」的怪獸（例如騰訊，700），一係就派高息、「定過抬油」的霸權股，如港鐵（066）、領展（823），近期炒到大折讓資產股，連麗新系也不放過，某程度上也是反映「無股好炒」，並非好現象。
半年結在即，大戶似在頂指數出貨，以恒大（3333）為例，成個頭肩頂形態出曬嚟，長汽（2333）也是一棍大陽燭後就開始派，有貨宜減持。
魏力
http://www.fb.com/2012jason
本欄逢周一、五刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
魏力
異動空間 - 魏力 舊文
來源 source: http://hk.apple.nextmedia.com
