中資金融股夠硬淨
2017年06月23日
港股昨日先揚後挫，指數一度升得唔錯，但彈得咁上下又有壓力，指數微跌收市。A股入摩有進展，國企指數表現就比恒指好，當中以內地金融股較為硬淨。
招行質優彈逾3%
恒指昨日收報25674，跌20點；國企指數就背馳向好，收報10402，升9點
，成交金額781億元。藍籌股騰訊控股(700) 繼續升唔停，收高0.9%，收報281.6元，中資金融股係硬淨份子，中國平安(2318) 漲0.5%，收報52.25元；建行(00939) 除淨，股價微升0.33%，收報6.12元；工行(1398) 升0.6%，收報5.15元；招行(3968) 逆市急漲3.6%，收報22.95元；中國人壽(2628) 漲1.9%，收報24.25元。中資金融股向好，多少同入摩效應有關，加上佢哋市盈率低，容易俾人買番高啲，招行係外資評價最優質嘅內銀股，於是先彈得高。
上周五政府推出屯門地，最後以31.68億元批予路勁基建(1098) 及深圳控股(604) 。有關地盤面積逾13.1萬方呎，指定作私人住宅用途，涉及總樓面約47.3萬方呎，折合每方呎樓面地價約6700元，高過市場預期。呢排內房商來港買地無之前氣勢咁勁，但依然密密入貨。深控早前出售咗喺其他地方嘅地皮，睇嚟o依家有意加強投資香港，將資產集中番喺中港兩個一線城市。由於佢買地成本唔平，所以對股價無乜刺激，深控昨日收市報3.49元，跌咗2.2%。
另一單地皮交易係本地薑宏安地產(1243) 喺二手市場，購入1幅馬鞍山白石耀沙路政府地皮，項目以轉讓公司形式易手，市場估計成交價逾27億元，平均每方呎約7000元水平，該地皮由國企內房中國城市建設、夥拍俊和於2年半前奪取，當時作價逾21.3億元。上述為馬鞍山白石耀沙路地皮，位處沙田市地段第601號，佔地252954方呎，可建樓面約38.75萬方呎。消息話中國城市建設(國際)及俊和早前透過大型測量行，以暗盤形式，於市場上放售該地皮，吸引一眾發展商垂青，最終宏安出價最高，以獨資形式奪得。
俊和肥肉地平買平賣
白石地皮拍賣時，地產市道仲係相對低，o依家業主出售即執幾億元，當然有着數，但就未賺到盡，對宏安地產嚟講係執咗平貨，所以股價昨日逆市升咗，報收1.68元，升咗2%。宏安買到好嘢，固然可喜可賀，有中環茶友就話，宏安喺低潮時執咗平地，成功上到市，但土地儲備少，令人擔心有啲無以為繼，o依家買咗個項目，對佢保證盈利有好處，要留意係佢掛牌以嚟升咗唔少，所以唔好高估咗呢個好消息嘅作用。
至於賣家點解唔等起好樓先買呢？有可能係同股東之間意見唔同有關。因為中國城建本來入咗股俊和母公司亞洲聯合基建(711) ，連名都改埋，但之前卻出現波折，o依家仲賣埋個項目分手。亞洲聯合基建本身有唔少生意同資產，執咗呢塊平地本來都幾肥仔，o依家食咗唔消化就有啲可惜。
陸羽仁
金融High Tea 舊文
來源 source: http://hdfin.stheadline.com
