【實力取勝】沈大師分析有根有據（陳承龍）（第130期）
2017-6-22 18:30:39
人氣嘅嘢，真係好奇妙。好似小弟呢啲小股民，開咗《策略王直播室》之後日日同大家炒炒炒後，行街食飯撞到唔少素未謀面嘅人，都會主動同小弟打招呼，嗌聲「社長」或者同我吹兩嘴股票。其實直播室最高
收視時段，都係千零二千人同時收睇，但唔好睇小呢個數字，因為大家都係有質素嘅股民，有時發掘到一隻股票，齊齊買齊齊贏錢，力量真係好大。咁當然有贏有輸，小弟都有中招嘅時候，總之贏就一齊叫囂，輸就一齊鼓勵，呢個感覺真係好奇妙。
同樣關人氣事，有小弟嘅同事圖太郎。條友仔股齡其實好耐，佢人生第一次買股票嘅時候就輸大錢，因為撞正八九年民運事件，大家話佢幾資深啦，之後仲喺報社做財經版記者，好有經驗，今次佢為小弟嘅直播室拋頭露面講股票，起初見佢都好唔慣，但自從條友開咗自己嘅facebook page後，由於fans越嚟越多，自信心好快返曬嚟。由於圖太郎好勤力出Post同答fans問題，佢個fanpage快速增長，睇個勢好快人數倍增，搞到小弟都有啲眼紅佢（講笑啫）。
講到人氣最最最最最勁，一定係沈振盈沈大師。《策略王》當日喺winmoney.hk開設「三點九沈大師」後，一度多人睇到冧server，依家各大股民討論區，唔少人都mon實「三點九沈大師」，證明當日增加呢個環節嘅決定冇錯。講句公道話，雖然好多人都會用一個另類角度睇、甚至分析「三點九沈大師」嘅「真意」，但沈大師嘅分析真係有根有據，唔似得其他股佬咁無棱兩可。好似19號嗰日，沈大師話睇好強勢股例如滙控（00005.HK）同內銀內險股，理由係破位要追，點知錄音一播出之後，滙控被人連沽3檔，第二日（20日）收市跌多8格，小弟都唔知講咩好，有時真係有股神奇嘅力量，令到一隻萬幾億市值嘅股票突然轉向，科學都解釋唔到。順帶一提，小弟曾經喺直播中用大師嘅反方向落盤，事後都有同大師溝通返，佢都明只係互相搞下氣氛。你哋話啦，沈大師又有經驗又唔方丈，佢人氣咁犀利係咪合情合理？
實力取勝 - 陳承龍 舊文
來源 source: http://www.winmoney.hk
