生活 - 葉朗程 2017年6月26日
喂呀，唔好退休啦
李嘉誠（圖片來源：李嘉誠基金會）
候機室內，吃了一口叉燒包，想起誠哥。
以前國泰這個候機室的叉燒包事很不錯的，梗係啦，半島 manage，服務與質素當然不用質疑。但自從國泰跟半島終止合作，這裏的叉燒包不好吃了。
原來國泰的叉燒包不可以沒有半島，那麼長江的董事局可不可以沒有誠哥呢？
廣告
咁梗係可以啦，一間藍籌要靠一個人嚟維持，就唔係藍籌啦。
但作為誠哥的粉絲，我就是不想他退休。
廣告
只有是誠哥的忠實粉絲才會明白，為什麼誠哥退休會這樣令人惋惜。
我們早就知道，年屆八十九的你，不知幾多年前已經退下火線，業務的交接工作也做得妥妥當當。
我們早就知道，作為香港唯一一個神話的你，是如何為自己是香港人而感到驕傲，也是何等擔憂這個城市是否應付到未來的種種挑戰。
我們早就知道，身家不知是幾多個千億的你，投資已經不是純粹向錢看，而是想盡力改變世界，水平和眼光亦遙而遠之地超越一般豪商高官，當政府說這個那個是什麼高科技的時候，你已經不屑跟他們玩 hi-tech，因為 hi-tech 對你來說已經不夠 high，聞說你老人家每天幾個視像會議所圍繞的領域叫 new-tech，一個其他所謂土產人上人坐部穿梭機都追唔上嘅層次。
關於你的事，我們都知道，但我們不甘於只知道這些皮毛，我們想知道更多。
命理學家都說，李嘉誠三個字是一個奇蹟。
唔怕生壞命，最怕改壞名，原來你的名字，從很多術數專家的角度看，是一個失敗得不能再失敗的名字，即是所謂衰到貼地。每個名字內裏都蘊藏著「很多條數」，而「李嘉誠」這幾條數，算出來是一個，想嗰樣冇嗰樣、帶遮就陽光普照唔帶遮就肯定落雨落到狗血淋頭、買大必定開細買細永遠唔會開大的，終極黑仔王。
中環人說你是神，因為你運籌帷幄；玄學家說你是神，因為你改變了自己的命運。
由終極黑仔王變成香港首富，有很多故事，有很多法則，有很多奇蹟，有些你有交待，有些你欲言又止，我們真的想知道更多。作為你的忠實粉絲，能夠聽你一輪嘴講嘢嘅機會，只僅限於長和的業績發佈會，如果你真的退休了，以後豈不是不能再聽到你用唔鹹唔淡卻又充滿親切感嘅廣東話跟我們天南地北？
可恨我不是記者，每次業績發佈會，不能當場來個與神對話，而如果我是記者的話，我必定會以美色誘惑那位叫 Wendy 的長江 PR，讓她必定要記得在雲雲記者中給我一個機會向你發問。
想問，穩健中不忘進取，進取中不忘穩健，請問去到幾穩健先要進取，去到幾進取先要穩健？又想問，為什麼一億已經可以讓霍大班笑到見牙唔見眼的時候，你要給他二億，又或者，是否只值二億，而不值三億？更想問，作為老闆，你點睇返工要打卡？長江員工要打卡返工，和記員工唔使，咁係咪真係長江比和記更 productive？點解和記而家唔使返星期六，而長江仲要返長短週，係咪每兩個星期返多半日工真係差之毫厘富之千里？
明白的，呢啲嘢，應該問番你嘅 PR 同 HR。
既然唔問得呢啲，我可否代表香港人，甚至是全球華人，向你提出一個簡單的請求？
香港很多 DSE 學生感激你，因為你給他們每人派了五千大元，無疑這是一個巨大的創舉。
但。
Give a man a fish and you can only feed him for a day，五千蚊梗係好多錢，但有啲唔識講嘢嘅學生又話，區區五條嘢，喺你旗下嘅豐澤求其買部電腦都已經冇咗仲分分鐘要貼多幾舊，but if you can teach him how to fish and you can feed him for a lifetime，所以其實你會唔會考慮出本書，等佢哋將來長大成人，可以好似你咁叻，對住一啲有需要嘅人派錢？
你曾經說過，小時候，你不是求學問，是搶學問。香港人淨係識搶錢，唔識搶學問，但要是出自你身上的學問，我們必定搶得獸性大發。
來源 source: http://thestandnews.com
生活 - 葉朗程 舊文
