大笨象威過股王騰訊
2017年06月30日
國家主席習近平訪港，咁啱遇着外圍股市向好，變成起上加起，港股一舉爆上281點，收25965點，逼近兩萬六千點，睇吓今日六月埋半年數，指數可唔可以破關嘞。
美國國債債息上升，加上市場預期所有銀行都可以過到聯儲局的資本評估，利率敏感的銀行股
大升，摩根大通及美國銀行升逾2%。杜指收市升左143點，收報21454點，升幅0.7%。標普500指數收市升幅近0.9%，是兩個月以來最大單日升幅。美股升幅強勁，帶動亞洲區股市向好。
受惠美國同行帶動
最近美國聯儲局維持對未來息口循序向上嘅取態，市場反應較為平和。新加坡金融管理局局長孟文能係公佈年度報告嘅時候就話，全球經濟應能夠適應美國加息，但鑑於金融市場已經習慣了超寬鬆貨幣環境，仍須保持警惕。如果加息速度快於預期，那麼各經濟體和市場有可能失去平衡。
中央銀行家講話永遠都戴晒鋼盔，孟文能嘅講話反應佢對未來經濟係息口正常化偏向樂觀。正如早前所講，聯儲局雖然話會漸進式多次加息，幅度卻只有0.25厘，同以前一加就0.5厘相去甚遠，令佢嘅抑壓增長嘅殺傷力大減。
市場對利率環境感覺較輕鬆，主要影響宏觀氣氛。中短線明顯啲嘅因素，係聯儲局係周三表示，已完成了針對美國銀行業年度壓力測試的第二個環節，並批准了接受測試的所有34間銀行的資本回報計劃。市場認為這是美國銀行業首次全體通過壓測，顯示這些銀行不僅建立了充足的資本，而且改善了風險管理。
幾間大銀行在通過壓測後即刻宣佈大幅提高對股東的資本回報，花旗集團宣佈將季度股息提高一倍，至每股32美分，並宣佈了一項156億美元的股票回購計劃，成為花旗有史以來最大規模的股票回購。同一時間，摩根大通宣佈，將季度股息上調6美分，至每股56美分，自今年三季度開始生效。該行還宣佈，將在7月1日至明年6月30日之間回購至多194億美元股票，也是摩根大通歷史上最大規模的股票回購計劃。美國銀行都不甘後人，宣佈三季度開始將季度股息上調60%，至每股12美分，仲同其他行家一樣批准了一項120億美元的股票回購計劃。幾家大銀行宣佈回購，即時令股票供應扭轉，資金湧出市場而股票供應減少，所以令到美國銀行股急升。
有貨唔使一次過沽清
外圍利好因素吹到香港，帶動埋本地嘅銀行股大升。大笨象滙豐(005) 更受惠魔笛追魂，大摩出報告唱好，仲上調目標價兩成至84元，仲唱到「最牛」情境下目標價可上望93元，大笨象立即變小飛象，勁升左逾6%，高收72.8元，成交達仲多過85億元，比「股王」騰訊(700) 的45億元多出一大截。除左大摩唱好，英國有可能加息，渣打(2888) 都升4.4%，收78.7元。大摩出報告唱好大笨象唔止係斷估，相信係睇準美國監管形勢對銀行業經營有利，由於美國銀行業俾人勒緊咁耐，而家開始鬆綁，若然有貨在手就算想食啲胡，最好都留番啲注碼係手，未必須要一次過沽清。
跨國嘅銀行股大升之餘，中銀香港(2388) 同大新金融(440) 都造出新高，分別升左3.2%報38.9元同1.7%報65.1元。佢地雖然無海外業務，上升因素有的唔同，但由於利率向上加上佢地資本充裕，都一樣可以水漲船高。係銀行股領軍下，恒指高收25965，升281點；國企指數收報10432，上漲23點，成交增至808億元。
陸羽仁
金融High Tea 舊文
來源 source: http://hdfin.stheadline.com
