笑到最後：北水炒法露玄機
■近期炒風見到，北水明顯聚焦落一兩隻港股，東方海外係近來其中一隻。 資料圖片
東方海外（316）終於承認董建華家族持股的69%股份會賣出，回帶年初已有傳出此消息，近月有大行報告再重彈舊調令市場再度關注。但實際上，真正推升股價嘅係被稱為「北水」或「大媽資金」嘅
中國證券登記結算經紀牌。一般相信過去大陸佬炒股唔睇價，鍾意掃上去，咁先夠豪氣。2015年發展至極致係隻隻掃，掃到兩千億元成交，最後發現咁係搵唔到食，入咗沽唔到，或者被人當接貨工具。
近期炒風見到，北水明顯聚焦落一兩隻港股，炒爆一隻便轉至另一隻，例如騰訊（700）炒爆，便轉至滙控（005）。首先唔好神化北水，大家都係人為操控，一樣會有情緒，價啱一樣會食糊。但用「大媽資金」來形容，係錯嘅，因為大媽肯定冇咁多錢，亦肯定消息冇咁靈通。
以東方海外為例，6月突然激增北水牌，以每日買數十萬股速度增持，大約涉及資金過千萬，至6月9日持股終於超過1%。同期唔少外資牌一路減持，但北水牌卻人棄佢取，一直增持至超過1%。至上星期尾，北水買入速度加快，連續兩日以每日增持超過百萬股的速度，一口氣將股價推升至60元樓上，至周末啱啱好公佈賣盤。聯交所資料顯示，最新持股已達2.8%，直逼持股2.9%嘅花旗。
呢種買入方法，完全唔似係大媽，背後幾億錢，可能只係來至少數幾個最接近消息嘅中國人，然後一個傳一個幅射式擴散開去。到近日見股價已追唔切先不問價衝。資料顯示，6月28日至7月4日之間嘅港股通資金流入東方海外4.66億元，上周五全日交易更達4.76億元，成交明顯急增。
同樣炒法，相信會係未來北水方程式，翻看滙控同期資金流入45.79億元，滙控已經成為下一個北水炒股嘅新戰場，持股已達4.02%，聯交所持倉計第二大。如果東方海外短時間拉閘停牌，嗰邊嘅北水食糊，睇嚟有新錢轉入另一戰場。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com
