財路：信義光能食正國策
■信義光能主打太陽能電場，食正環保國策。 資料圖片
信義玻璃（868）一年累升35%，旗下信義光能（968）同期累跌25%，明年預測PE6倍單位數，平通中港，炒同系連枝，買硬數據，一樣有得諗。
信義光能主打太陽能玻璃同太陽能發電，上年度，集團盈利一枝箭增長65%，
到19.8億元。仲要咁睇，上年，信義光能唔只營收提升，毛利率更上到46%，比2015年大大幅提升改善。
信義光能喺日熔量900噸嘅玻璃熔爐，技術獲得突破，實現成本減省，邊際利潤改善，靚爆鏡！再講，信義光能主打太陽能電場，都係喺電力需求高地區，所以，呢瓣冇受到限電影響，呢瓣又有自己優勢。
又按計劃，內地連同新發放光伏再生能源項目，安裝目標去到30吉瓦。信義光能就估計，若要趕及今年上半年指標期限，可能創造額外下遊需求，有助維持太陽能玻璃市場嘅增長動力。
另13.5，發改委規劃到2020年，太陽能發電裝機7,000萬千瓦，估計新增投資1萬億元人仔。呢個新增額度，亦係各瓣潔能中，增加最多。仲未計，一帶—路底下，周邊地區衍生需求。信義光能單係食住本身優勢，同環保國策，已經掂過碌蔗。
場內專業預測，信義光能就算計埋今年上半年供股全面攤薄，今明兩年eps0.33元同0.37元，現價2.31元預測PE得7倍同6.2倍。場內近磅行家，中天科技（滬600522）同隆基股份（滬601012），今明兩年預測PE，全部雙位數。信義光能平到笑！
信義光能現價翻半番到3.5元咁計，明年預測PE9倍，仲未上到雙位數，keep住平通中港！
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.apple.nextmedia.com
