買盈富執個桔
2017年07月25日
港股再升140點，進一步逼近27000點水平。雖然指數高升，但股民買股未必賺，皆因升勢集中，主要係大股同埋強勢股之上。
大市再升，而且以全日高位收市，但升勢主要係股王騰訊(700) 同近排強勢保險股之上。若然嫌大價股重本或唔敢買強勢股，咁基
本上好難賺到大錢。我喺網誌提到今年高盛炒業唔係好掂，影響盈利表現。喺特朗普上台後，美元見左高位回落，好似澳元呢排升完再升，令好多投資者都跌左眼鏡，再加埋股市飊上去，但高盛唔係特別睇好，令到佢嘅盈利表現及唔上預期。
有騰訊幫手升贏好多藍籌
高盛表現無以前咁好，有中環茶友認為同佢上左市有關，因為佢上市之後，公眾股東多左，本來合夥人制沖淡左，咁自然無咁盡心盡力搵錢，又或者搵到錢的合夥人不如自己做，都會令到高盛原本嘅企業文化改變，影響左佢嘅表現。
投資銀行係人的生意，最大資產就係叻人，但叻人搵到錢，佢會諗點解我要同股東分呢？呢個就係問題嘞，所以高盛係金融市場高峰上市，合夥人係最佳時機散水，之後佢嘅盈利就要望天打卦。茶友話，遇着呢啲狀況，有時買啲簡單的投資工具好似掛牌基金(ETF)，有時仲好過買啲靠高手賺錢的股票。
以港股為例，包含所有恒指成交股嘅盈富基金(2800) 一月初造緊22元，昨日升上27.55元高位，累計升左25%，升幅比起好多藍籌都好。
盈富基金能夠擊倒唔少藍籌股以至於專業基金經理，皆因佢按照恒指成份股去買，淘弱留強，就算騰訊係咁升，佢都唔會有畏高症，好多人唔敢買騰訊，怕一買佢就回頭，咁咪坐左隻千年艇，但買盈富佢地就無咁驚，無咁大坐艇憂慮，所以茶友話無買騰訊、買左盈富，都算係執唔到個橙執番個桔。
茶友講到盈富基金咁好，咁豈不是令到專業基金經理好難撈，實際上自從ETF出現，確實係令到基金經理競爭大左好多。不過，茶友話基金經理都要增值，若然只係簡單咁跟指數買賣，就算唔畀指數掛牌基金取代，都會畀機械人取代啦。積極啲講，依家大市升幅仲係集中係優質股之上，好多三、四線股都未升，基金經理賺錢嘅難度仍然高，如果個市繼續升上去，個市炒味濃番啲，咁基金經理咪搵到食囉，做金融三年唔發市，發市當三年，講走短線炒作，盈富基金同其他掛牌指數基金都仲係代替唔到嘅。
車股輪到華晨發力
大市繼續向好，恒指收報26846，升左140點；國企指數收報10820，漲33點，成交金額791億元。十大成交金額股份，排第一係大熱門騰訊，佢再創新高302.8元後，收市升1.75%，報302.2元，單計騰訊已貢獻恒指50點升幅。第二係長城汽車(2333) ，無升跌，收報10.04元；盈富基金(2800) 跟住已經排第三，微升左0.55%，收報27.55元，可見買盈富執個桔嘅人可能都唔少；第四嘅吉利汽車(175) 急升6%，不過收報18.62元都只係算高位徘徊，車股板塊輪流炒，隻華晨(1114) 急升8.5%，收報18.2元，升得仲更加有力。瑞信預期澳門7月份博彩收入增長超預期，維持看好兩大藍籌濠賭股，銀娛(027) 收報47.8元，升3.6%，亦貢獻左恒指12點升幅。
受惠於上周五建議豪派特別股息，並獲大行看好的電能(006) 與長建(1038) ，曾高見77.35元及72.8元，分別創近兩年半及逾一年高位，電能以全日高位77.35元收市，升2.6%；長建以近全日高位收市，收報72.25元，升3.7%。
陸羽仁
金融High Tea 舊文
來源 source: http://hdfin.stheadline.com
