魚樂無窮 - 唐牛 2017年7月25日
魚樂無窮：內房股破頂之選
■時代地產主打廣東省中高端住宅物業，有六成土地儲備處於大灣區。 互聯網圖片
港股再破頂，內房股更是越戰越勇，不過唔少一味靠北水推高，基本因素存疑，夠膽衝入場的戰友絕無僅有，好睇唔好食。
今日推介的低調內房股時代地產（1233）則不同，防守及進攻力齊曬，有得睇有得食！
7個月升咗九成，唔驚接火棒？望一望派息，你會放下心頭，集團去年末期息35.74仙，現價股息率接近6厘，市盈率未夠5倍，防守力一流，高位入場都絕對安心。
管理層講明，派息比率會力保兩成以上，意味賺錢越多，派息越吸引。集團上月公佈合同銷售額49億人仔，為今年最勁，下月3日公佈中期業績，肯定靚爆鏡。
時代地產主打廣東省中高端住宅物業，最新年報顯示，有六成土地儲備處於炙手可熱的大灣區，贏在起跑線。證監曾於2015年公佈，時代地產屬股權高度集中，即意味股價容易波動，但集團上月發通告，表明相關問題已解決，董事會相信已符合打入恒指及大摩指數系列成份股。
背後意義係乜？三個字講曬︰深港通！下月16日恒指季檢，話唔定就係集團升呢之時，一旦北水容許掃貨，真係估唔到頂囉。
唐牛
http://www.fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com
