笑到最後：
機會留畀新香港人
■喺香港，打工最美嘅日子已經過去。 資料圖片
剛過去嘅周末，電視上演一幕幕當眾擦鞋嘅情景。本欄始終係投資版文章，政治評論都係交由政治專家評論，不過，擦鞋擦出面唔單止係經濟問題，同時亦都係投資問題。
自古擦鞋就有市場，因為市場風高浪急，投資者都係人，難以預測
揼咗落去嘅錢，會唔會有回報。擦鞋變咗一種心靈安慰，有人喺投資者身邊係咁講「真係㗎？點解嘅？你好叻呀」，積極作用係安撫投資者情緒，等佢繼續投資並且經營生意，成班兄弟繼續有飯開，有時就係靠嗰位擦鞋仔一句半句安撫。
當然壞處就係公司已經成形，有人想嚟黐餐。呢種擦鞋，相信好多讀者喺辦公室已經見慣，所以唔重覆。不過無論係邊種擦鞋，過去嘅做法，就係盡量將擦鞋嘅行為收埋，因為始終唔係一件光彩嘅事。
啱啱過去嘅假期，其中一幕擦鞋將會影響無數辦公室生態，兩位香港上咗年紀嘅人爭住向北面嚟嘅貴人擦呀擦，一個就說盡好話，另一個就陪笑，成個過程係直播，連坊間一啲KOL都冇諗過直播擦鞋，上一代反而諗到用呢種方法呃like，可見上一代KOL，想呃like可以更狠。
呢個舉動將會扭轉過去對擦鞋嘅睇法，公開擦鞋將會成為「新常態」，估計以後華資公司會爭相仿傚，邊個公開擦得勁，邊個就升得快，亦都唔會有人藐，因為藐嘅人無法入職。大家可能會以為，日後擦鞋就有出頭天，呢個只係一廂情願嘅諗法，因為只有上咗年紀、上曬岸嘅香港人，先有資格擦，而被引領去面聖嘅就係一位內地出生嘅本地居民，即係內地傳媒所講嘅「新香港人」，隱喻一班已上位嘅香港人，將來亦只會畀機會新香港人，一般香港後生仔連鞋刷都唔會掂到。
所以打工最美嘅日子已經過去，97年前移民潮坐低年年升職，97年後未移民嘅已經坐定定唔會走，僅餘嘅機會亦都只會留畀新香港人，上述呢一幕，篤醒咗香港出世嘅後生仔：喺香港打工，係冇前途架！
高明
http://www.fb.com/bigricetea
本欄逢周一刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
高明
笑到最後 - 高明 舊文
來源 source: http://hk.apple.nextmedia.com
