中環在線：股壇長毛想交易大堂變溜冰場
港交所（388）打算今年十月摺埋交易大堂咁大件事，噚日同前董事、有「股壇長毛」之稱嘅David Webb傾開，佢覺得應該將呢個地方改做溜冰場！好
等中環人行過鬆一鬆，肯定好受歡迎咁話喎。不過以佢老哥人物性格，一聽就知係反話喇。
其實早於千禧年，市場已討論過大堂去留，但因為樓底高、無窗，難搵其他行業租客，所以作罷。Webb覺得喺原址整展覽館根本唔會賺錢，叫港交所唔好再嘥股東錢租場，交番畀政府放售套現仲好。
50歲出市代表嘆不捨
交易大堂真係一個好代表到香港嘅地方，大家睇電視劇《大時代》，見劉青雲同鄭少秋著住件紅衫仔，跑來跑去幫客落盤，1993年高峯期，呢度有近1,400名出市代表。
可惜時移世易，隨住交易系統升級，交易大堂嘅功能減退，噚日華華只數到十幾名出市代表喺大堂，大量吉位放雜物。未到12點休市，已有經紀一支箭衝去放飯，其他經紀有啲就聽電話，同客人傾嚇咩價位先好買，個別經紀就睇報紙瞌下眼瞓之類。
有位年近50嘅出市代表，知道交易大堂退役嘅消息，心情好差，佢話剛入行時，成個大堂坐滿人，間間證券行都派兩個經紀做出市代表，又試過好似《大時代》咁跑住落盤，但家陣隔籬左右都走曬啦。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
