收市閒情：海怡寧靜去哪兒
■海怡半島當年嘅賣點係「擺脫繁囂」，但如今寧靜不再。 資料圖片
「要擺脫繁囂鬧市，同時享有都市便利，仲要有一望無際嘅藍天碧海……」呢一段咁平實嘅廣告旁白，當然唔係呢個時代嘅產物！冇錯，呢段嘢係來自1992年鴨脷洲海怡半島廣告。時移世易，一眨眼25年，海怡半
島景物依舊，樓價全非。不過，話曬海怡半島係長實（1113）其中一個招牌屋苑，位置優越，長實要搵錢，當然冇一刻忘記過海怡。
話說之前已Plan喺海怡嘅核心，長和旗下港燈停車場大樓改建成酒店，早幾個月仲話，510間房太少，要劏出1,200間房，落成後會係全港第三大酒店！海怡半島總單位數目先係得9,812個，即係區內無啦啦多咗12%單位，最重要係咩？呢批單位全部係生保人！呢批生保人，將有潛質為海怡半島帶來翻天覆地改變！
海怡本來都已經有個Joyce（647）Warehouse，世界各地名牌咩都有，最重要係，「那是奧特萊斯！」。所以酒店落成後，呢個本來已經係自由行景點Outlet，將會繼續發光發亮！你諗嚇，旅行時如果酒店隔籬係Outlet，有咩可能唔會日日行！海怡居民真係有福了，Outlet長旺唔會執，想平買名牌幾時都得。
食就唔使講，做得遊客生意，嘢食唔慌會平，不過點都會有遊客名物進駐，突然口痕想食珍X曲奇不用怕！不過，正所謂「人人Sharing Economy」，有間酒店喺附近，搞Carpool唔怕冇人Share ride。只要有諗頭，個個都大茶飯。
真係人人大茶飯咩？想錯你個心。正所謂賣出去嘅盤，等如潑出去嘅水，發展商唔通仲會同你癲，繼續幫你保住當初個Selling Point「擺脫繁囂」，建設寧靜嘅小社區？
𠵱家行入海怡，反對港燈改劃酒店Banner掛到四圍都係；買呢批長實樓，就係貪佢係中產小社區，唔使食得招積，但要住得舒適；但𠵱家反過來，居民仲要勞心勞力集氣頂住長和系。香港人，想安居樂業啫，放佢哋一馬啦。
千頌C
http://www.fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com
