Money Walker：買金避險唔老土
■特朗普近期政治醜聞纏身，故被指對外挑起衝突，轉移大眾視線。資料圖片
政治、經濟同金融市場從來環環相扣，尤其是有侵侵呢啲惹火人物存在時。
當選9個月加上任7個月，侵侵大選前承諾嘅減稅兼增基建至今依然冇影，加上政治醜聞纏身，難
怪近期北韓局勢轉趨緊張，被指其實係佢刻意挑起，藉此轉移大眾視線之技倆。上述講法倘若屬實，金融市場就真係多得侵侵唔少，事關搞到金融市場早前震盪，環球投資者要齊齊付出成本幫佢做呢場大龍鳳。
對投資者而言，北韓局勢固然需要關注，但侵侵動向與言論亦不得不防，因為一旦將來美國內政風波再度升溫，侵侵又重施故技再對外挑起衝突，減少外界對自己嘅聚焦，避險資產勢將不時受捧。對沖基金Bridgewater創辦人Ray Dalio早前已撰文，建議投資者喺政治事件下，黃金應佔投資組合內5%至10%比重。
雖然未知侵侵到處煽風點火係咪未來新常態，但即使北韓導彈威脅平息，接下來美國國會又要面對債務上限再次到期，故即使港股近期跑出，表現靚仔過美股，透過資產配置分配控制風險呢啲老生常談，仍有價值。
另外，有唔少分析指加息環境下，美債價現價過高，不過考慮到美國久不久就出現上述呢類隨時觸發市場避險嘅「灰犀牛」事件（指可預見但遭忽視，有機會造成重大衝擊嘅事件），筆者始終認為，美債並不如想像中咁冇市場，因市場的確存在支持債價嘅避險需求。
El.
El.
Money Walker - El. 舊文
來源 source: http://hk.apple.nextmedia.com
