內銀去槓桿不一定壞事
2017年08月16日
港股繼續反彈，喺地緣政治和緩下，港股反彈無外圍咁好力，應該係香港提早一日喺周一已透支左反彈嘅真氣，噚日初段喺內銀股帶動下股市上升，反映市場傾向買啲低估值嘅股份，市場睇落仲係有啲怯，結果大市升幅下午愈縮愈窄。到三點內地收市後，港股臨尾急回，
由升轉跌，最後跌75點收場。
金融股今年有好表現，呢樣嘢由美國帶頭，主要係美國經濟回暖，銀行環境好番，加上監管環境相應放鬆啲，令銀行業有條件動用手頭資金回購，呢個做法提高股東回報之餘仲直接減少左市場上股份嘅供應，香港掛牌嘅銀行股好似滙控(005) 、恒生(011) 股價都受惠。
渣打深回 值得考慮
另一隻跨國銀行渣打(2888) 本來都升得幾好，但中期無回復派息，股價隨即俾人插低。中環茶友話，渣打業績好番無耐，中期唔派息都係穩陣之舉，市場借住預期炒得太高，所以先跌番，依家佢插穿80元，之前掂到100天線77.2元，噚日收78.3元，畀左有興趣上車者一個可以考慮嘅機會。若怕風險等佢行深一步，去到150天線75.2元，都有相當投資價值。
內銀股同國際銀行股有啲唔同，我喺網誌提到有經濟學者話全球經濟有同步跡象，比較上內地同西方雖然互相影響，但因為體系不同，始終關係無咁直接，所以上半年內銀表現嚴格嚟講追唔上大市，主要係內地經濟呢兩年處於調整期，北京追求穩定多過刺激增長，內銀派息好，作為穩定收息對象唔錯，但市場維持俾佢低估值，影響佢地股價上升能力。
大市升到咁上下，要上破兩萬八，就要有新火車頭。原先帶領大市衝關嘅超級火車頭騰訊(700) 有啲啞火，市場估計係十九大前對科網股監管只會加強不會放鬆，炒佢會增加左難度，唔排除有啲資金就買吓內銀股。特別係環球經濟回暖，人民幣匯價穩定番，令到低估值嘅內銀股，變成有番啲可買之道。
中環一班茶友之前討論開好唔好高追市盈率60幾倍嘅騰訊，當中有人認為騰訊有壟斷優勢，應該唔會輸晒身家，但依家買佢未來一年賺錢同輸錢嘅機會都係一半半，如果用番同一個值博率，咁買內銀股賺錢機會率未必會低過股王，而且佢派息仲高好多，等如送左個投資保險喎。
上半年賺多左8﹪
講起內銀嘅動態，都要講吓同時局有關嘅嘢，內媒呢輪成日針對住幾間搞嘢民企融創(1918) 、萬達，質疑佢地搞交易係轉移泡沫，甚至以泡沫撐泡沫，提出要大力去槓桿，呢個過程都有質疑銀行賺錢太多、賺錢太易，言下要求銀行配合避虛入實，要借多啲錢畀實業股，借少啲錢畀炒作股。
過去內銀嘅信貸同壞帳風險係外資最擔心嘅地方，令佢地一直唔肯提高內銀股嘅估值，貴少少都唔買。依家監管機構加強對佢地貸款嘅限制，咁做有辣有唔辣，辣嘅地方係令銀行未來賺錢難左，唔辣嘅是咁其實都減低左銀行體系嘅風險。中銀監公佈，上半年商業銀行累計實現淨利潤9703億元人民幣，按年上升近8%；從呢角度睇，如果要買嘢，平平地嘅內銀風險會低過貴股，當然如果佢跟住明顯炒高左，咁就要留意去槓桿嘅影響嘞。
內銀股帶動唔夠力，股王騰訊再跌，結果恒生指數收市插左75點，收報27174，成交金額943億元。受惠中資金融股向好，國企指數收報10738，反而上揚左30點。內銀大股工行(1398) 收5.55元，升2.8%，其實表現已經相當唔錯、建行(939) 收6.52元，升1.09﹪、中行(3988) 收3.9元，升1.6%，騰訊就續跌1.6%，報318.8元。
陸羽仁
金融High Tea 舊文
來源 source: http://hdfin.stheadline.com
