智取大市：升市失機之死穴
■港股整體大市成交未到頂，大價股睇怕繼續發癲。 資料圖片
近期有一個趨勢，強勢股無啦啦升市逆市轉弱，令短線客見佢零舍弱勢、篤眼篤鼻而沽走佢，唔使兩日股價便轉強爆升。一隻係前排中遠海控（1919），另一隻係洛鉬（3993），上星期四升市見隻洛鉬即市走勢唔多妥，兩
個鐘唔夠由高位震倉跌足7%，相信大部份短線客都會先走為敬，點知……短短兩日掉頭就爆升破頂了。
雖說坐功重要，但坐貨要考眼光又考信心，呢兩樣嘢唔係講嚇就有。如果每次升市，手上都有強勢股逆市震倉，要承受升市輸錢嘅壓力，唔比大跌市容易得多。如果抵受唔住而換馬，換去以為十拿九穩之後會升嘅股票，但往往沽嗰隻就升，買咗嗰隻就停喺度，於是慘案又出現。
既然升市有呢種模式，咁就順應潮流，今日睇嚇有乜單日轉弱嘅中長線強勢股？就包括汽車股吉利（175）、中升（881）、手機股王舜宇（2382）等等，即管睇嚇係咪快將發力，有興趣短線一博無妨。
如果揸實上述二三線股，信心不足又驚震嘅話，咁一係選擇低難度動作，揀返騰訊（700）、友邦（1299）、滙控（005）、港交所（388）、平保（2318），大價股升勢確係誇張，整體大市成交未到頂，大價股睇怕繼續發癲。大價股及強勢股升浪長到巨龍咁長，資金轉往落後股嗰轉，相信一樣驚人，稍後唔使愁冇機會。
晉佳
http://fb.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com
