富豪大執位
2017年07月31日
港股於期指結算日受壓，恒指係兩萬七千關口得而復失，恒指收報26979；國企指數收報10756。以全周計，恒指累積上升273點；國指累積下滑31點。七月累漲1,214點或4.7%，跑贏全球主要股市。美股上周五就繼續在高位徘徊，杜指收市報21830點，
升33點，納斯達克指數收市報6374點，跌7點，標普500指數收市報2472點，跌3點。全周大市基本上都係睇住騰訊(700) 起跌，佢上周氣勢如雄，一口氣衝破300元大關，最後一個交易日先跌番1.2%，收報304.8元。
滙控業績成周初焦點
上周滙控(005) 一度炒業績，之後係高位徘徊。係大笨象公佈前，同屬跨國大行嘅瑞銀集團公佈，第二季淨利潤11.74億瑞郎(約12.1億美元)，較上年同期增長14%，較預測8.79億瑞郎為佳，同時係連續第二季賺錢。上半年，瑞信3個財富管理部門吸引資金淨流入228億瑞郎，管理資產規模增長8%至7160億瑞郎，上半年瑞銀繼續減省成本方針，預計全年可達降成本185億瑞郎的目標。同業業績對辦，令市場對滙控有期望，佢能唔能夠交出功課，會係周初港股市場焦點，對大市氣氛都會有影響。 七月份全球股市向好，成為富豪大執位嘅時間，全球首富多年來一直由微軟蓋茲坐住，直至上個星期，借炒阿馬遜業績，創辦人貝索斯終於超前，成為全世界最有錢嘅人，個人財富達到7000億元，稍微多過蓋茲。
美國o依家兩個最有錢嘅人，都係做科技起家，但蓋茲創辦嘅微軟，算係傳統科技公司，隨著電腦被智能手機搶走咗好多用戶時間，微軟嘅增長都受到壓抑。貝索斯所做嘅網購，則屬於新經濟概念，憑住龐大嘅數據，市場憧憬佢能夠不斷跨界別經營，所以俾佢好高嘅估值。呢個首富排名係按股市價格變動計算，貝索斯能否繼續壓倒蓋茲，要睇未來科網股嘅高估值能否維持。
騰訊跟住美國科技股炒
阿馬遜公佈業績前，同屬新經濟股嘅FB宣佈業績都好靚仔，令股價創新高。上個月美國科企股出現大震倉，令到香港嘅科網股都腳軟，呢排美國科技股掉頭再炒過，香港嘅股王騰訊(700) 跟住屢創新高。騰訊同美國掛牌嘅阿里巴巴股價水漲船高，雙雙衝破3萬億元市值，兩間公司嘅市值已經大過香港一年嘅生產總值，仲超過咗好多唔細嘅國家，財勢可以用富可敵國嚟形容。
講起科網股呢排炒得咁高興，有本地薑毛記葵涌都傳出申請上主板的消息。毛記葵涌大家或者會有啲陌生，但毛記電視後生仔好多都會聽過。據報道，經營《黑紙》雜誌、《100毛》雜誌及「毛記電視」網視嘅「毛記葵涌」，已搵咗保薦人長雄證券申請一主板。初步招股文件披露，「腦細」林日曦(原名徐家豪)、陳強(原名陸家俊)、阿Bu(姚家豪)為控股股東，共持有毛記90%股權；《明報》控股股東世界華文媒體(685) 持有其餘的10%。截至今年3月底止，毛記全年收入9522.8萬元，按年升73.6%；期內賺3626.3萬元，按年升61.9%。集資所得擬用於併購；加大投資毛記電視及採購新設備。
毛記葵涌幕後有財技高手
「毛記葵涌」話傳上市，市場反應有啲兩極。係股市浮沉得耐、屬於股市老兵嘅中環茶友聽見已經灑手擰頭，話呢啲潮流嘢又無乜資產，買小小無興趣，買得多又唔想博。不過，有茶友就從炒作概念拆局，話毛記電視原來咁好賺，做九千幾萬生意可以勁賺三千幾萬純利，呢盤暴利生意隨時仲勁過蘋果iPhone，大家仲留意到保薦人長雄證券母公司係大凌集團，大股東「大凌張」係以抽水聞名嘅財技高手，以此股的知名度加上有財技高手助鎮，招股時找啲名人認購壯大聲勢，隨時吸到大班股市新兵入紙。而家佢哋興講「借定唔借、還得到先好借」，咁班年輕人借晒孖展去炒舖勁，你又點知佢唔會變翠兒BB股2.0呢？
晒豪宅騷廚房 土法煉鋼「穿崩」
地產商近年賣樓要講心思，尤其豪宅更加要落足心機。上個星期，會德豐就擰咗件山頂MOUNT NICHALSON出嚟，結果又賣到好價錢。近年豪宅盤賣點之一係名牌厨具，好似SUB.SERO電櫃、 WOLF爐具等，仲不時係佢哋灣仔嘅展銷廳搞吓活動，早排仲邀請咗中環茶友去參加。
SUB.SERO雪櫃近年在荷里活名人間大行其道，經典場面係用佢哋超靚鋼水嘅櫃板擋子彈。聽講，呢個牌子同荷里活有默契，就係英雄同好人先可以用，奸仔角色就無緣埋身。
名牌廚具身價不菲，豪宅要雪櫃、酒櫃、爐具「執齊一套」，動輒就要一百幾十萬，有出席嘅貴賓就話，留意到有個最近好出風頭嘅「傳媒大亨」，俾記者去參觀佢係大埔豪宅，唔知係咪對方留意到佢嘅鋼身酒櫃唔係名牌，所以自爆係請咗師傅返屋企度身訂造。佢咁樣土法煉鋼，唔怪得有人對佢嘅財力提出多少疑問啦。
陸羽仁
陸羽仁周記 - 陸羽仁 舊文
來源 source: http://hdfin.stheadline.com
