操盤手劄記：高息低PE筍股
■晨鳴紙業中期多賺86%，預測PE6倍，預測息率達8厘。 互聯網圖片
美國出現百年一遇嘅日全蝕，香港出現132年一遇嘅高溫，喺星空奇遇記之後，美股衝高1%，港股就打風休市。恒指周二升246點或1%，雖然收復10天線同20天線，但仍處於下降三角形內。若能
突破，有望挑戰前浪頂27876；反之，則維持待變格局。
本周市場焦點，係周四至周六舉行嘅Jackson Hole全球央行年會。喺環球通脹低迷、經濟活力欠奉下，市場關注美國聯儲局主席耶倫、歐洲央行行長德拉吉嘅演說，對收水步伐有乜啟示。
今年以嚟，喺美歐龜速退市、中國經濟回穩下，原材料價格喺大宗商品市場不斷炒上，相關股票亦熱炒，有色金屬股、煤炭股、油氣股、紙業股先後落鑊。一眾資源股中，我頗為睇好紙業股，一來係供給側改革，二來係需求增加，都令紙業復蘇、紙價回升。
龍頭之一嘅理文造紙（2314），周一交出一張靚成績表，中期多賺53%，正係受惠供給側改革、環保整治，令行業汰弱留強。理文績後獲多間大行調升目標價，刺激股價破頂，現價PE13.5倍，息率3.3厘。其實，另一龍頭晨鳴紙業（1812），上周二派嘅成績表更靚，中期多賺86%，現價PE9.9倍，息率5.9厘；預測PE更低至6倍，預測息率則可達8厘，可謂高息低PE筍股。
雖然晨鳴盈利增長好過理文，但理文近日股價表現更省鏡，點解？關派息事！晨鳴係國企，唔派中期息，理文係民企，一年派兩次息！不過，無論從PE、PB、息率嚟睇，晨鳴都比理文更吸引。現時網購盛行，包裝紙需求大增，紙價持續上升，晨鳴全年盈利肯定唔差，集團又願意派高息，可望再展升浪。
講開又講，禮拜日萬人上街反政治檢控時，特首林鄭月娥咪同高官邊食燒味邊腦震盪嘅，佢喺facebook上載嘅相片中，同黃錦星嘅合照最搶眼，搶眼在於身為環境局局長嘅黃錦星都用即棄餐具！話時話，芸芸即棄餐具中，紙杯紙碟最常用，難怪紙價上升啦！
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com
