操盤手劄記：國壽趁唞氣低吸
■國壽為中國最大壽險商，有國企背景，勢將受惠新政策。 資料圖片
踏入八月，天時暑熱，市場氣氛亦好熾熱。道指連續5日破頂，恒指亦連續3日創兩年新高，兼連續兩日成交過千億元。港股成交大增，究竟係上升動力加強，抑或大戶高位派貨嘅見頂訊號？姑勿論係點，港股連升7
個月，風險日增，後市嚟個較深回調唔奇，但牛市應該未完。
睇7月期指結算前，大戶喺稍高於26800加倉，計及8月因除息因素低水約120點，若果8月期指收低於26680，就要小心港股轉弱。往年成日聽見基金經理放暑假，今年少聽咗，老實講，遇著牛市，芬佬點捨得行開；遇著市況波動，亦唔敢行開囉！
港股今年以嚟已累升5,600點，升幅達25%。今輪牛市嘅特色係大股輪流炒，破位後越升越有，唔會有太多回抽入市嘅機會，稍一遲疑就蘇州已過。資金傾向買大唔買細。
眼前冇嘢平靚正，唯有睇下有冇追落後之選。以各地股市嚟睇，中國股市明顯落後，今年以嚟只累升6%，但我認為明年投資重點係A股，不妨開始建立A股倉。九七回歸時，香港GDP佔中國GDP近兩成，現時只佔不足3%，所謂此消彼長，經濟如是，股市亦然，點都要有啲A股配置。
揀A股同揀港股一樣，要做功課，怕揀錯股，可揀A股ETF或基金；若果A股唔係你杯茶，則可揀被視為A股proxy嘅內險股。據講中保監年尾搞個資產負債管理制度，以「好孩子」同「壞孩子」嚟區分保險商，「好孩子」有更多投資靈活性，「壞孩子」則有更多投資限制。
整固一輪嘅內險股，包括藍籌平保（2318）、國壽（2628）應聲再炒上，不過兩股衝高後唞氣，可吼位低吸。內險股中，國壽相對落後，作為中國最大人壽保險商，有國企背景，向來係阿爺嘅乖仔，勢將受惠新政。睇走勢圖，國壽呈現杯柄突破利好訊號。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com
