馬主席撐高鐵有理
2017年08月03日
今個星期港股連升三日，開始升到落後嘅地產股，當中九倉同港鐵都有進帳，中環茶友聚會傾起依家熱烘烘嘅一地兩檢，有茶友預計一地兩檢必然扑鎚，長遠而言，高鐵對香港嘅地運應該助力不少。
高鐵應唔應該有一地兩檢，茶友有唔同意見，有人話一向口才唔錯嘅特首
林鄭月娥，唔知點解忽然整咗句如果擔心(行近高鐵會被人捉)，咁咪唔好搭囉，成為反對者嘅話柄。
雖然係咁，但在座者都覺得方案最終應該會通過，因為大家心知肚明，呢個係唯一選擇，實際上反對者都拎唔出一個有效嘅辦法取代政府方案。
樹大招風被人捉字蝨
從現實嚟講，有咗一地兩檢，市民往返內地方便好多，茶友中有人不時上大陸傾生意，佢話有咗高鐵佢就唔使驚內地空管，呢樣嘢對營商環境好有利。
佢仲笑言，睇過政府嘅規劃，將來高鐵站係用接駁交通運輸，估計站嘅周圍唔會見到人來人往，人流會喺車站搭車，反而佢周邊嘅商場就可以受惠，可能因為咁，所以噚日地產股都郁咗，九倉(004) 仲升得好勁，成為大市領漲主力。
九倉呢個月派成績表，呢排大公司業績多數靚仔，大摩先嚟「摩笛」追住唱好，雖然評級維持「與大市同步」，但目標價由65元大幅調升至73元，刺激股價裂口高開。茶友話，短期九倉喺大陸賣樓收入應該靚仔，中期本地旅遊業似乎見咗底，加埋未來如果有高鐵帶啲客去到佐敦，都對佢有利，大行自然唔怕偷步炒吓先。
茶友話，高鐵開通在即，有冇一地兩檢好重要，所以港鐵主席馬時亨都出嚟幫拖，話如果冇一地兩檢，每個月八千萬營運費猶如「倒錢落海」，佢呢個講法就畀反對方案嘅人捉字蝨，話佢報大數、靠嚇。茶友就抱打不平，話高鐵依家未開通，港鐵幫政府管理高鐵條數都未計清楚，每個月八千萬係人都知係個約數，呢啲叫做槍打出頭鳥，樹大所以招風，根本拗都無謂。
茶友話，高鐵工程已經完成在望，如果冇一地兩檢，高鐵效益成疑，作為管理嘅港鐵變咗食塊雞肋。
相反，如果有咗出入境便利，將來高鐵丁財兩旺，咁港鐵點都有着數，所以肥馬出嚟幫手解話，可以話一為神功，二為弟子，最緊要對得住市民同股東，就算畀人鬧又有乜所謂。
港鐵股價喺大派紅利後除淨抖咗一輪，呢輪主席開腔，股價又硬淨番啲，收市去番45.55元，升逾1%，同歷史高位46.98元相差唔係咁遠，可見聰明錢點理解呢件事。
潮流興偷步炒業績
噚日大市喺九倉、長和(001) 、滙控(005) 帶動下，最多升207點，高見27747，再創逾兩年新高，尾市獲利盤湧現，大市升幅收窄，恒指收報27607，升67點或0.24%；國企指數收報11055，上漲31點或0.28%，成交金額1048億元，三大藍籌合共推升恒指61點。
今日公佈中期業績嘅長和，獲多間大行唱好，噚日股價一度高見108元，收報107.5元，升3%；滙控周二展開回購，噚日股價升0.63%，報79.35元，如果大市無乜濕滯，佢都好大打機會打破80元大關。至於公佈業績嘅渣打(2888) 中期仍未能恢復派息，股價喺倫敦初段下插，其實佢元氣初復，市場都唔係咁預期佢派息，所以消息相信唔係咁大殺傷力。
大市成交持續兩日創新高，落後嘅港交所再升，收報229.8元，升近1%。資金同時流入證券股，西證(812) 升5.88%，報0.27元；海通國際(665) 升6.5%，報4.93元；申萬宏源(218) 升7.7%，報3.22元；國泰君安(1788) 升8.2%，報2.65元。內地證券股早前受監管風暴打擊，股價比較落後，如今有少少追落後嘅味道。
陸羽仁
金融High Tea 舊文
來源 source: http://hdfin.stheadline.com
