【實力取勝】炒股最緊要有氣氛（陳承龍）（第146期）
2017-10-12 17:30:47
近期市況好轉，小弟呢排推嘅股票，例如銀基（00886.HK）、卡姆丹克太陽能（00712.HK）、SOHO中國（00410.HK）、天下圖（00402.HK）、木薯資源（00841.
HK）、華誼騰訊娛樂（00419.HK）、首創環境（03989.HK）同國安國際（00143.HK）等等，好多衝完一浸，都會回吐或者整固。不過好多睇直播嘅朋友，見佢唔升之時就開始驚坐艇，喺到鬼殺咁嘈，亦令到小弟感受到壓力。其實只要個市仲有氣氛，啲錢冇走到，使乜驚喎，唞幾日咪又會再爆上，係咪先？
其實喺呢啲大牛市，每次回吐做旗之時，都係低吸良機，就以華誼騰訊娛樂為例，小弟係喺去廈門個金誠控股（01462.HK）trip、大概3毫左右介紹，好快就衝上4毫子，之後就被人打番落去3毫6，其實最緊要有人拎錢入market食貨之嘛，你鬼殺咁嘈沽咗佢，咪畀咗機會一班實力持貨者咯，華誼騰訊娛樂喺呢啲位收一輪貨後，眨下眼就爆咗上5毫子咯，調轉頭睇，當日高位，咪係今日低位咯，驚乜啫？
又好似恒騰網絡（00136.HK），舊年由7毫子車到落1毫子，我喺直播表演撈唔到底即輸20萬大家都應該會仲記得，但呢個世界一雞死一雞鳴，實會有人要返佢啲貨掃上去，之前隻嘢日日喺2毫9左右打幾億成交，就當個大戶喺嗰個位派貨，但當有人食得曬啲貨，就真係會掃得返上去，依家咪4毫子樓上咯。呢排個市場有氣氛，大家應該大膽啲去坐貨等爆升，咁當然都要睇公司質地、有冇前景同概念，但爛到好似集成（01027.HK）嗰啲就算吧啦，相信華誼騰訊娛樂孭住恒大（03333.HK）同騰訊（00700.HK）個名，驚得咁多咩。
與此同時，大家嘅mindset都要放得遠啲，好似華誼騰訊娛樂有得炒，咪留意埋阿里影業（01060.HK），呢排網劇《反黑》咁hit，證明網劇有得做，佢仲做埋O2O淘票票，戲迷經佢買飛，即係做埋大數據。所以係個market入面，真係要好機動性咁樣諗嘢，小弟仲要糾正大家，$1.34一股嘅阿里影業，300幾億市值大家嫌貴，$0.425一股恒騰網絡，又係300幾億時值但話平，好錯咯，唔好畀個面價呃到，要睇市值㗎。
短期心水就一定係阿里影業，抵博㗎，上面講啲概念真係要留意。同埋要睇氣氛咯，仲要有質地配合，當然唔排除小弟喺節目掃貨會令呢個氣氛火上加油，大家博之時，記得秤下啲公司乜質地咯。
實力取勝 - 陳承龍 舊文
來源 source: http://www.winmoney.hk
