智取大市：內地樓市轉捩點
■內地新建住宅平均樓價大概3年一個升跌周期，目前開始見頂回落。 資料圖片
噚日講到港股轉勢訊號，再睇個股，舜宇（2382）9月數據冇驚喜，野村估10月出貨量因假期因素而微跌，拖累股價跌近半成，強勢股承接力下降，唔係個別事件，落後股更成為僅餘選擇。現時一動不
如一靜，少啲持倉、少啲出入都冇乜錯。
轉個話題，講嚇股市長遠好淡因素。最大隱憂似乎係內地金融系統性風險。國有銀行主宰行業，只會縱容泡沫一路加劇，加上剛性兌付本質，斷唔會由銀行違約去引發泡沫爆破，最大機會觸發系統性風險，係樓市泡沫爆破，就算唔爆破，可見將來只要一個驚字，都足夠港股震倉。
近期中央透過大規模限購、限貸令，令到內地樓價升幅放緩。值得留意嘅一粒數，係內地70大城市新建住宅平均樓價按年變幅，由年初嘅升幅一成以上，慢慢放緩到8%左右。唔好睇小呢個轉變，近十年有參考數據至今，新建住宅平均樓價變幅呈波浪形，大概3年一個升跌周期，目前開始見頂回落，而過去3次見頂回落，新建住宅平均樓價最終會出現按年下跌，即係內地樓市中期表現有可能差過預期，至於會唔會演變成驚嚇位？稍後先知。
嚟緊唔爭在講嚇全球資產市場情況，跟手再講科技投資帶來嘅超級龐大利好因素，但呢樣竟然都同樓市有關！
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
