財路：津創大落後博爆邊
■津創股價近期打橫行，跑輸同業，現價買入，博爆邊。互聯網圖片
中國水務（855）短短兩個月，翻咗半番，場內天津創業環保（1065）同期打橫行未鬱過，行家當中，津創尤其係PB，係至平選擇之一，買津創，博爆邊。
津創今年上半年，盈利增長近8%，到2.5億元人仔，有板
有眼。再睇資料，內地環保部新鮮熱辣上半年水汙染防治報告，包括天津地區，喺城鎮再生水處理、同農村汙染項目上，相對滯後。
又據內地官員估計，喺水十條下，全國喺水務瓣數投資額，達到4.6萬億元人仔。
睇到係，無論係主打地區，以至環保國策下，全國性水務瓣數，都有唔少財路，都對津創起到積極面。又津創由汙水處理、水務供應、再生水，集團呢幾年亦走出去，先後中標多個天津以外汙水處理項目，津創瓣數全部齊備，又有競爭力，有運行。
場內專業預測，津創今、明兩年EPS0.48港元同0.51港元，預測PE10.6倍同10.1倍，兩年預估PB1.04倍同0.96倍。津創香江H股半年嚟未升過，現價5.23元，內地A股（滬600874）現價折約20.2港元，H股比A股大折讓74%，A股今、明兩年預測PE49倍同46倍，預估PB4.8倍同4.5倍。
上邊中國水務今、明兩年度預估PB1.6倍同1.5倍。又內地熱爆行家碧水源（深300070）兩年預測PE23倍同17.9倍，預估PB3.3倍同2.8倍、永清環保（深300187）預測PE33.4倍同26.4倍，預估PB4.3倍同3.8倍。津創至抵搞！
呢轉煲津創，當追上中國水務50%升幅，津創要見7.8元，目標價明年預估PB1.4倍，啱先追番上中國水務，但比對其他行家，津創仲係平咗一大截！
錢雋 細價股專家
本欄逢周二刊出
錢雋
財路 - 錢雋 舊文
來源 source: http://hk.apple.nextmedia.com
