港交所要當落後股炒
2017年10月17日
喺港交所(388) 向政府提出減股票印花稅嘅傳聞下，港股再創新高，焦點中嘅焦點港交所一度升咗10元，證明叫政府放水，真係講吓都有着數。
市場傳聞港交所要求政府降低股票印花稅，有中環茶友笑言，要求降低股票印花稅，係港交所嘅千年立場，只要呢個稅一日未取消，幾時講都啱，
關鍵係有幾認真，同埋政府睬唔睬佢。
對於呢個傳聞，港交所高層似乎有啲冷處理，甚至有少少降溫嘅味道，身為主席兼行政會議成員嘅周松崗拒絕評論，行政總裁李小加就話，好多重要香港金融市場發展嘅議題上，都喺政府主導下作溝通、討論同埋建議，包括市場交易成本問題。據佢所知至今冇任何計劃、決策，係政府要審閱同埋研究印花稅事宜，相信只係市場猜測。李小加不忘補多句，話基於歷史原因，無論係股票印花稅或物業印花稅，都係政府重要部份，相信唔會輕易改變，若果要改變都要經過大家討論，咁即係話連佢都唔覺得減印花稅短期會成事。
憧憬減印花稅下，港交所股價一度飆咗10元，報219.6元，收市升咗6元，升幅2.7%，收報225.6元。依家股市唔係咁差，睇唔到政府點解要益股民，所以減印花稅有小小煲無米粥嘅味道。
但港交所股價都有唔錯進帳，陸羽仁有小小覺得係炒落後嘅味道。早兩年好多人鍾意買港交所，貪佢做獨市有買貴、無買錯，但我就話無買錯，但買貴咗就唔值博，要留意嘅係佢市盈率高，但高增長不再。睇番上年佢純利57.7億元，倒退咗27%，睇番佢股價喺大時代2015年5月份，曾經做過298元，同高位比仲差成25%明顯係落後，就以噚日收市價比，都未去番一年高位233元，所以當係落後股都炒番吓。
陸羽仁過去覺得港交所唔係咁吸引，認為有好多股票回報好過佢。港交所現價225.6元，市盈率高達47.4倍，息率得1.9厘，睇佢連交易大堂依家都話摺埋，可見公司都要好努力交數。
未來港交所嘅前景應該會平穩番啲，至少港股成交由2015年高峰期調整落嚟，去年跌咗，今年應該有改善，加上商品價格回升，有利佢英國公司生意，今年上半年增長勢頭有望延續。依家港交所嘅增長要睇內地公司同資金落嚟嘅數量，以及開拓新產品好似債券通，以至未來新股掂唔掂。依家政府對同股不同權開咗綠燈，對佢爭取內地科網巨企會有利，從呢個角度睇，佢嘅前景應該好咗啲，所以股價雖然唔平，未來或者可以繼續當落後股炒。
喺炒港交所帶動下，恒指升幅曾擴大至315點，報28792，再破近十年高位。下午升幅收窄，恒指收報28692，升216點；國企指數收報11602，漲83點，成交1033億元。成功分拆在望嘅騰訊(700) 收升1.83%，收報355.6元，其他中資金融股普遍向好，證券股同樣受惠造好。耀才(1428) 升4.7%收報2.7元，國泰君安(1788) 則升3%收造2.65元。
呢排新股上市多，香港交通關鍵系統解決方案供應商高萌科技(8065) 首掛，收報0.87元，較發售價0.6元上升45%，唔計手續費同佣金，每手5000股賺1350元。地基承建商永勤集團(8275) 首掛收報0.36元，較發售價0.34元，上升6%，唔計手續費同佣金，一手10000股賺200元，計埋就可能要蝕錢離場。織帶製造商飛霓控股(8480) 首日喺創業板掛牌，報收0.64元，較發售定價0.5元上升28%。
香港家居用品供應商舍圖控股(8392) 首掛報收0.245元，較發售價0.22元，上升11%，呢啲股仔日後成交可能好少，如果只係博利是，最好都係快啲計數啦。
陸羽仁
金融High Tea 舊文
來源 source: http://hdfin.stheadline.com
