笑到最後：買牛證當旅遊保險
■港股10月19日單日大跌後表現陰陽怪氣，但牛市完結嘅表面證供未夠，估計只係震倉。資料圖片
恒指調整期間，高明剛好外遊，本來打算旅行期間完全唔睇市，變相撲暈自己。遺憾放假前工作太忙，此篇《笑到最後》無暇兼顧，只好邊玩邊寫稿，焗住要望望個市。
高明上周三喺
電台開咪，叫人一注預全輸嘅注碼，買當時最貼價28000點收回嘅牛證，買一注「獨贏」（win），當時恒指約28165點，至周五收報28438點。10月19日單日大跌後股市陰陽怪氣，但推測牛市完結嘅表面證供未夠，估計只係震倉。因為牛市完結，至低限度要達成以下條件：（1）新股潮；（2）散戶人人贏錢；（3）細價股狂升；（4）最醒嘅人抽水；（5）最遲鈍嘅人入市。
現時市況，新股潮已經開始咗，又眾安（6060）又閱文（772）；散戶未人人贏錢；細價股9月開始有炒風，但近期又轉弱；馬化騰沽貨同閱文分拆，但往績冇代表性，真正指標係馬雲推螞蟻金服上市；最遲鈍嘅係政府，連行動最慢嘅政府都買港交所（388）或減股票印花稅，個市應該差唔多，不過，現階段未出現。
排除長線因素，就睇短線。7月至今每月一震倉，短線原因包括北韓飛彈、美韓口水戰、加泰獨立、殺牛，個個都似是而非，最似真相係金管局，早於8月9日及9月19日兩次宣佈，合共增發800億元外匯基金票據，頭一次配合金北韓金正恩導彈，港股大跌千點；後一次亦導致港股9月調整948點，相對其他外圍理據，抽資因素令股市下跌的原因更實在。不過，金管局總裁陳德霖最近表示，暫時無計劃進一步增發外匯基金票據，震完倉機會較高，所以放心買牛，暫時脫離打靶漩渦。不過，講完一大輪分析，買牛證嘅更重要原因：擔心去完旅行返嚟恒指見三萬點，自己追唔切，惟有當買份「旅遊保險」，始終，大牛市冇份贏慘過輸。
高明
http://fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.finance.appledaily.com
