中環在線：中國家居董事收一蚊打工
咪以為做上市公司董事就一定高薪厚祿，好似中國家居（692）呢隻停牌三個多月嘅二三線股，公司噚日宣佈委任黃坤華、陳璐分別做執行董事同獨立董事，兩人為支持公司發展，
自願象徵式每年收1蚊袍金；咁都唔止，公司7月委任為董事兼行政總裁嘅黃鴻照，原本話有100萬元年薪，𠵱家都話為支持公司，放棄今年年薪，只收1蚊，認真偉大呀。
呢隻中國家居，今年中被沽空機構烽火研究狙擊，冇耐被證監會勒令停牌，原因係懷疑公司2013年嘅財務數據存在若幹不規範，公司仲停緊牌。
「為彰顯對公司支持」
不過，停牌似乎無阻中國家居發展，公司舊年底宣佈收購廣東省嘅神舟航天樂園項目，早前公司召開股東特別大會通過改名，將會叫做「神舟航天樂園集團」。公司同時請來38歲嘅黃坤華做執董，佢目前做緊廣東盛世遊艇會董事總經理，為加快推進航天樂園項目，佢自願任職期內只收1蚊袍金；只做獨董嘅陳璐同樣只收1蚊。
最偉大嘅可能係黃鴻照，佢7月做行政總裁，公司話畀佢100萬年薪，點知𠵱家話「為彰顯對公司支持」，佢今年只收1蚊。不過睇番資料，黃鴻照有喺新西蘭投資葡萄酒莊，應該有米之人，不在乎百萬年薪啩。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
