內銀估值唔貴 大象都跳舞
2017年10月04日
內地喺國慶假期間公佈明年定向降準，消息刺激港股復市即刻大升，資金湧入中資股，當中內銀股成為最大贏家。
人行提出定向降準，希望將資金推向中小微企。人行有關負責人就實施定向降準話，按現有數據測算，對普惠金融實施定向降準政策可以覆蓋全
部大中型商業銀行、約90%嘅城商行同約95%非縣域農商行，但政策唔會改變穩健貨幣政策嘅總體取向。
定向降準放水較少
對於呢次安排，中金公司(3908) 解釋，人行今次定向降準，並唔係完全新增降準政策，而係替代政策，以中金理解唔係放水，政策主要意義係落實國務院發展普惠金融業務，支持實體經濟嘅部署。
中金話，呢次降低準門檻降低，普惠貸款嘅定義擴大，佔比具體化，而且第二檔降準嘅幅度都加大，由100點子到150點子。對流動性影響嚟睇，絕大多數銀行滿足今次定向降準第一檔嘅條件，即係可以降準50點子，邊際上或者可以涵蓋更多嘅商業銀行；第二檔定向降準幅度擴大，俾符合條件嘅銀行額外降準50點子。預計今次定向降準喺出年年初實施時，可以額外釋放2000至4000億元人民幣資金，緩解春節流動性壓力。考慮到係替代原有定向降準政策而唔係額外降準政策，流動性投放規模會低過一次全面降準嘅6000至7000億元。
交銀推薦穩健內銀股
交銀國際都發表報告，認為定向降準增量資金釋放規模有限，唔改變穩健中性嘅貨幣政策取向。該行認為，去槓桿引導資金投向實體經濟仍然係監管嘅主調，人行通過公開市場操作調控流動性，唔傾向全面降準。交銀國際重點推薦穩健型銀行，例如建行(939) 、農行(1288) 同埋中行(3988) 。
阿爺雖然強調穩健財政政策不變，中金又話定向降準唔係放水。我就話呢啲只係表述問題，定向降準唔係全面放水，但仍然係放水。由於中國嘅廣義貨幣增長不斷放慢，再係咁落去，中國經濟捱到今年第四季，都捱唔到出年第一季，怕經濟增長會明顯放慢，所以阿爺提前做工夫，十分到位。中資金融機構咁樣解讀，只係緊跟阿爺口徑，唔希望造成起哄效果，係可以理解嘅。
但市場行動就好誠實，一窩蜂爭住去買巨型內銀，工行(1398) 升7.9%、建行(939) 升5.9%，呢啲市值過萬億嘅股份咁升法，單係佢哋合共為恒指貢獻237點升幅，可以話大笨象都跳舞，顯示市場認為人行放水更直接利好內銀。唔單止建行同工行急升，其他內銀股都普遍造好，招行(3968) 升8%報29.65元；重農商行(3618) 、光行(6818) 、中行(3988) 都升5%，。
之前人行用好多工具調節貨幣供應，有時都有放水，但市場冇乜大反應，但今次對定向降準反應咁大，可以話市場認為阿爺傾向寬鬆，係真唔係已經係後話，市場點解讀馬上反映喺股價之上。內銀股依家估值相對偏低，好似工行依家市盈率先得6.7倍，息率超過四厘，上升空間點都比啲估值已經貴嘅股價大。
港股噚日喺內銀帶動下先升為敬，大市一開就急升，逼近28000點關口，之後愈升愈有，最後收報28173，升618點；國企指數收報11305，漲395點，成交增至1031億元。帶領大市升勢主要係內銀股，十大成交金額股份首位係騰訊(700) 升左3.2%，收報346.8元，推升恒指92點升幅。獲大摩唱好嘅吉利(175) 升12.27%，報收24.7元，為表現最佳藍籌股。喺中資金融股帶動下，恒生H股(2828) 急漲3.7%，收報114.5元。不過大市升得咁急，小心再行一段就回吐。
指數大好下，內房股回升，恒大(3333) 升8.8%報29.65元；華南城(1668) 升6.3%報2.37元；奧園(3883) 升5.5%報4.6元；融創(1918) 收升4.62%報37.4元，仲創咗新高。
陸羽仁
金融High Tea 舊文
來源 source: http://hdfin.stheadline.com
