【實力取勝】炒股要群策群力（陳承龍）（第149期）
2017-11-2 17:30:12
呢排病病哋，有時做節目明顯露咗疲態，真係要同各位觀眾講聲唔好意思，好在真係病到做唔到節目之時，班同事輪流幫我頂，小弟真心萬分感激。生病人人都會，社長我咁大隻，都唔似藥煲呀，亦會唔係喺度恃病
博同情，只係喺病之中感受到群策群力嘅重要性，當然，我講嘅係炒股。
就好似截稿今日（10月31日）為例，小弟下午開市一見到有話Dow Jones新聞話中國有機會解除禁韓令，即刻叫梁風幫我check，點知春秋航空原來今日有飛機復飛濟州島，而藍鼎（00582.HK）有項目喺濟州，股價亦都破緊頂，梗係照衝啦，2毫子樓下狂掃，day high見0.222，半日都賺到一成，算有交代啦。況且我冇自私食，開咪叫大家「唔好買呢啲股，有人覺得佢係老千股嚟㗎」，點知好多fans喺策略王fans留言，話好後悔冇買，呻自己一股都冇喎。就呢件事，如果只係我睇到單新聞，唔搵同事幫手check，一定會慢好多，所以小弟一向唔鼓勵炒股「自私食」，因為匿埋炒，有時睇錯咗一樣嘢，冇股友同你修正好易揩嘢，相反買乜都同朋友講，有咩自己睇漏嘅，即刻都會有提，可以避過唔炒陷阱，炒股有交流都好重要。
群策群力有咩例子？歡喜傳媒（01003.HK）咪係咯，截稿當日，佢盤路開始異動，由2.4樓下抽上2.5樓上，小弟見到即刻嗌咪叫大家一齊掃咯。隻嘢盤路係古怪㗎，Morgan Stanley同申萬宏源成日出牌頂住，唔畀隻嘢衝上2.6樓上，如果冇佢哋頂住，我哋咁齊心掃上去，個股價一早就絕咗塵啦。由於好多人入場掃，掃到「神秘力量」開始壓唔住個股價。股市從來都係錢多有主動權，但有時人多都會好辦事，就好似蟻多摟死象咁，舉例有個大戶有1000萬，同100個散戶每人有15萬，一邊沽一邊買，大戶都會唔夠散戶鬥，以前股價未縮窄買賣差價，滙控（00005.HK）散戶買盤用血肉長城頂住，仲成功食曬大戶啲沽盤，就係一個好例子。講返呢隻歡喜傳媒，價股回又回得唔深，一升又有盤壓住，似堅有料到，希望最遲聖誕前知道係咩事，大家有彈藥買禮物畀自己啦。
近期心水，仲多可望下隻結好金融（01469.HK），純圖靚，亦好乾身，一爆起上嚟見4蚊都唔奇咯。
實力取勝 - 陳承龍 舊文
來源 source: http://www.winmoney.hk
