【機會嚟喇】買牛的回報（飛雲）（第155期）
2017-12-14 16:16:28
踏入12月，假期氣氛開始濃起來。本來也打算12月提早收爐，有半個月可以好好休息一下！誰不知，上星期接了一個job，要為一家外資大行主持一個私人活動，點都要忙埋今個星期！不過，雖然個心已經放緊假
，但有生意做點都係好事，就辛苦多一個星期啦！
港股近期的表現繼續快上快落！睇返恒生指數近幾個星期嘅表現，由11月22日高位30199，回到落12月7日低位28134，圖表睇落好似跌得好急下，一路直插無停過咁，其中12月6日更是單日大跌618點，創下超過一年的單日點數最大跌幅。之但係，其實認真計一計，由高位回落到低位，其實都係講緊跌咗6.84%，以牛升市中的調整來講，如此幅度可說是正常不過。
話口未完，個市就於12月7日開始反彈，至執筆之時為止，五日間升咗四日，周三（13日）更是大彈428點，成功返回兩萬九關上，收報29222，足足比起低位回升1088點。這是否意味短期調整已完？暫時仍未敢講！不過，我仍然堅信，港股未玩完，明年有得繼續上，直至全民皆股再現為止！
令我看好後市的其中一個原因，是大市資金仍未見有明顯流出的情況。打開圖表一看，截至12月13日為止，港股已經足足28日錄得超過一千億元的成交！由11月6日開始，港股成交便一直維持於千億關上，而11月30日就更加造出1719.3億元的逾兩年新高。
從月線圖所見，11月的全月成交金額，是自2015年7月以來的新高。且看12月下半月，大市會否受到聖誕節及元旦假期的因素影響而導致成交下跌！老實說，以港股今年的表現，相信不少基金經理而家已經去咗渡假！但係近日仍然有此成交，表現也實在算係唔話得！
既然看好大市，咁我自己又有無咩動作咁呢？話說上周三，大市急跌之日，我也算是膽粗粗地買入了一隻恒指牛仔，其實主要都係睇圖表，見RSI跌到嚴重超賣水平，一心諗住博下反彈！
之後，恒指周四反彈，不過最終表現令人失望！到周五再彈，但我擔心外圍於周末期間唔知有咩發生，話曬而家個世界咁亂，真係兩日都已經可以有好多嘢唔同曬，於是於周五先沽掉一半牛仔食糊！到了星期一午市之前，因為當日下午要回內地辦點事，於是就將剩餘一半沽埋。埋單計數，利潤幅度大概係56%。咁如果我揸多兩日，今日先沽呢？以隻牛仔周三嘅收市價計，賺幅就係1.25倍！之不過咁，我亦都無因此而唔開心，因為，風險與回報係成正比嘅，於我此等凡夫來說，做人最緊要知足！而且，今次買牛也算是睇得幾準，足夠自我感覺良好一番，也算是另一種回報！
機會嚟喇 - 飛雲 舊文
來源 source: http://www.winmoney.hk
