偷步炒加息
2017年12月14日
今個星期美國聯邦儲備局議息，市場預計加息0.25厘機會高唱入雲，經濟好加息，美股當佢無到，前一晚再升過百點。
港股更有偷步炒加息現象，恒指重上29000關，收報29222，急升左428點；國企指數收報11519，升207點，成交金額1068億元，當中以金融股最標青，市場買息
差擴闊有利銀行生意，地產股都係回調低位反彈，實行喺美國加息前已炒壞消息消化。
輪到舊經濟股威番次
大市急彈，呢次終於唔係科網股最搶鏡，而係舊經濟股攞番彩，銀行股成為火車頭，滙控(005) 一度觸及80元，收升2%，收報79.95元，創左1年高位；之前公佈買入滙控股份的中國平安(2318) 雙雙上揚，升左1%，收報79.5元。屬本地銀行大哥大的中銀香港(2388) 首度升破40元，收報40.3元，升幅達3%。早前佢公佈第三季業績時，我話佢無問題可以低吸，結果真係在股價反映出嚟。本地銀行股恒生(011) 收報190.4元，升左2.7%。銀行受惠於加息拉闊息差，由此可見大市呢鋪係炒美息向上，加上有大行唱好滙控表現，令佢一舉破關。
加息銀行股炒升銀行股好正常，昨日連地產股都郁左，好似新地(016) 收報123.5元，升左1%，偷步炒落後味道都好濃。
過去美國加息，港息都無跟，但隨著港美息差拉闊，港元下半年不時出現弱勢，明年跟隨加息機會相對上升。經絡按揭轉介市場總監劉圓圓就預料，美國明年加息3至4次，加上美國稅改及縮表，料美元資產陸續回流本土，導致本港有資金外流壓力，本港銀行體系結餘由2015年10月4263億元，下降至現時1796億元，顯示資金正在流出，香港跟隨加息難以避免，相信最快明年上半年調整最優惠利率，全年加息1至2次，每次加幅介乎0.25厘至0.5厘，明年底實際按息將達2.4厘至2.65厘水平。在港息短期未知是否跟加前，地產股早前已經率先調整，大戶似乎趁壞消息前已經沽定貨。
港樓今年持續上升，去到年尾升勢都仲未停，不過，地產股走勢就有啲唔同，年中地產股走勢算係唔錯，到特首林鄭上任，大家憧憬官商合作，地產股喺第三季大力炒上，到10月份林鄭首份《施政報告》發表，大家睇真啲，發覺佢所提用農地起首置單位，只係雷聲大、雨點少，樓價於是繼續衝上去，但炒有平地起樓的地產股就開始回落，其後恒指雖然升上3萬點，但基本上地產股係無份。
以最多農地的新地(016) 喺今年9月13日就見左高價136.8元。同樣有好多農地的恒基(012) 表現強橫啲，佢喺9月18日升上55.3元先見頂，但10月仲彈過上去55.25元先反覆回落，由此可見地產股係受房策影響多過跟隨大市波動。
另一隻地產大股長實(1113) 走勢有啲唔同，佢早喺8月初已見今年高位70元，相對年初股份由49元起步，高點足足升足40%，之後佢雖然調整，但幅度明顯細過另外兩隻龍頭地產股。以佢昨日收市價65.7元計，只係調整左6%。長實表現咁硬淨，一個解釋係市場第三季一直憧憬佢賣中環中心，結果佢以402億元出售左呢項非核心資產，成為支撐股價最大力量。
地產股反彈只宜炒上落
如果睇番大型地產公司表現，佢地喺9月份炒作官商合作搞首置上車盤，到揭盅後開始失望散水。除左長實外，大股普遍調整幅度約為12至15%。新地年初股價100.9元，高位差唔多升左35%，高位回調約為11%左右。如果以政府數據，今年樓價上升約為10%，9月份地產股升勢平均去到30%以上，就係超前左樓價，呢個表現有3個因素影響，包括︰地產公司有借貸槓桿作用、股市大圍向好帶動作用以及新政府上場期望有利政策亢奮表現。當第三個因素減退，地產股就無法再跟進大市升勢，率先回落。
從今年至今累積升幅，雖然地產股已回調不少，但表現其實唔錯，只係因為科網股表現太突出，令到佢地變成跑輸大市。由於樓價o依家已經去到得人驚高水平，300呎唔夠的港島新樓未計折扣賣緊1000萬，計左折扣都要過800萬，相信無乜人會夠膽相信樓價可以喺比較長時間維時現今升勢。喺呢個假設下，地產股基本上無條件出現長期升浪，但由於佢地普遍都有好大折讓，主要都係當成炒上落高沽低買的目標。
陸羽仁
金融High Tea 舊文
來源 source: http://hdfin.stheadline.com
