財經評論：只升不跌唔健康
■港股連番升市下，越來越多市民開始關注股票走勢。 資料圖片
最近多位基金經理、大行策略師、資深投資者都睇好港股今年表現。事實上，港股今年開局勢如破竹，筆者唔係分析師，無意探究大市仲可以走得幾遠，不過就覺得港股近來只升不跌嘅現象唔太健康。
港股去年大漲，但參與嘅散戶唔多
，市場仍然理性，未到人人皆股。不過自今年起，港股幾乎日日報捷，市場氣氛漸見亢奮。恒指上周三首次破頂當日，友人傳來手機截圖，發現當日iPhone app store內十大熱門搜尋入面竟然有三樣搜尋係同股票投資有關，反映連番升市下，連無留意開股票嘅市民都開始關注。如果大市往後繼續不斷上揚而無出現較為似樣嘅調整，散戶將更蜂擁入市，到時人人皆股反而會令港股牛市無咁「襟玩」。
撇除市場氣氛，望一望恒指月線圖，大市紅盤高開，令恒指喺29997點至30028點之間出現裂口，據一位資深基金經理分析，呢類月線圖嘅裂口係唔會唔補返嘅；另一位資深市場人士講過，大市每年低位好多時都低過上一年嘅收市位（詳見本報本月8日及18日報道）。即係話，港股今年內好有可能會見一見二萬九或更低水平，如果大市往後繼續只升不跌，並走到某個高位先插返落嚟，相信到時唔少投資者都幾傷嚇。
大市升唔停，投資者亦會更貪心，令港股波幅增大，更加難玩。去年港股呈慢牛格局，投資者只需揀定好股buy and hold，在調整時趁低吸納就可享不俗回報。不過，今輪升市頗急，相信往後走勢將加快，亦更見波動，筆者不知道今年還是否適合buy and hold，但投資者需更關注短期市況波動、入市部署上更小心就應無懸念。
記者：莫亦熙
財經評論 舊文
來源 source: http://hk.finance.appledaily.com
