中環在線 - 李華華 2018年1月26日
中環在線：舖王冬泳教仔 成功需苦寒
■舖王噚日同傳媒分享教仔心得。
「舖王」鄧成波嘅成功秘訣係乜？登登登凳，咪就係遊冬泳囉。波叔今年84歲，仍十分精靈，原來佢以前經常遊冬泳，近年佢交棒畀兒子鄧耀昇（Stan），為鍛煉佢體魄，都要佢遊冬泳，咁都唔止，集團高層都要遊埋一份呀。
引彤叔賭王做例子
波叔噚日出席活動時話，自己70歲鬆啲，身體覺得唔妥先至冇再遊冬泳，家陣阿仔Stan同埋佢最得力嘅高層，每個禮拜都遊一次冬泳，「如果你哋各位能夠遊到冬泳，百分百事業成功。」原因係寒天飲冷水點滴在心頭，佢指，過去好多成功人士都遊冬泳，例如彤叔、何鴻燊。
佢又分享4句座右銘，「第一『高瞻遠足』：對住何事都睇長遠，好似年輕已唔食煙，以免年紀大氣扯扯。『克苦勤儉』：肯捱又勤力，搵到第一桶金但唔慳，左手來右手去，搵多多都冇用。『審時度勢』：睇環境，例如政府咁走，掹衫尾。最後『隨機應變』，如果明知山有虎，偏向虎山行，timing自己捉。」揸住呢4句，就算唔發達，都著數過人。
講到近日港股氣勢如虹，聞說佢揸住幾十億市值藍籌，佢認為「跌咗都會上番去。」佢最睇好嘅藍籌包括港交所（388），話「呢個我百分百，人格擔保。」指港交所個市升跌都有傭收；另外佢推介國壽（2628），覺得人有錢總會買保險。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
