尋找弱美元受惠股
2018年01月26日
A股略為回調，港股亦借勢唞唞。油金股就喺弱美元效應下，成為跌市奇葩。
美國通過減稅措施後，美元匯價開始腳軟，財長姆欽驚佢唔跌，喺瑞士達沃斯踩多腳，話弱美元符合美國政策，美匯指數應聲下滑，跌穿90水平。有中環茶友笑言，美元早兩年呈強，方便佢
買平鎊供仔女去英國讀書和供樓，O依家美元轉弱，就要搵啲弱美元受惠股幫補下。
弱美元被視為有利經濟，啱晒總統特朗普口味，美股乘勢再破頂。美股今年1月效應可以話發揮得淋漓盡緻。弱美元對本地零售股、旅遊股有利，對石油及商品股亦有支持。
三桶油長和逆市升
過去如果美元弱，游離資金通常會流入黃金、石油尋求保值。美匯指數呢個星期下插，指數下穿90，油價果然再飆高，三桶油昨日股價就再上，當中就有美元同商品價格互動關係。
中石油(857) 收升2.3%，報6.35元；中石化(386) 升1.9%，收報6.98元；中海油(883) 則漲0.6%，收報12.9元。其他石油相關股份同樣造好，巨濤海洋(3303) 再急升4.3%，收造2.65元。弱美元觸發油金齊鳴，推動金礦股大飆升，紫金礦業(2899) 日前發盈喜，股價飆8.3%，收報3.77元；招金礦業(1818) 升2.6%，報6.62元；靈寶黃金(3330) 報1.66元，升3.7%。大市下午跌幅加劇，但金價反而成為避風塘，股價不跌再升。
另一隻弱美元受惠股擺明係長和(001) ，佢逆市上升，收報106.4元，升咗1.7%。長和喺呢個升市都幾落後，一來係上個浪佢炒重組炒得勁，透支咗升幅，今個浪無咗重組概念，走勢慢咗亦好正常。再者，長和唔少資產投資喺歐洲同英國，美元強單係匯兌影響都削弱咗增長。
有熟悉該系公司的中環茶友話，長和有唔少基建投資，喺加息下基金會覺得平淡，若然可以增加派息，有助吸引內地基金收息，只係公司管理風格一向唔主張派高息，寧願保留資金用作投資用途。唔講加息，睇番美元轉跌，已經將佢股價重新推上紅底股。
抽水防加息或釀調整
大方向睇，美元有序調整，有利美股港股，要留意嘅係，企業見息口向上，紛紛發債鎖定資金成本之餘，大家見股票有價，多咗公司發股集資，成為股市調整藉口。昨日港股就借勢急跌，恒指收造32654，急挫304點；國企指數收報13388，下滑232點；成交金額1877億，強勢藍籌幾乎全線唞氣。
港股呢排係咁升，今年至今只調整過兩個交易日，主要係水頭充足，唔少資金由內地來港，所以港股呢排表現受北水影響。中環茶友自然有興趣研究內地投資者表現。有茶友話，內地投資者南下炒股可以分兩種，一種係自己有門路南下炒股，呢啲資金唔少已經南下，O依家流入的反而係另一種，佢地透過正式途徑落嚟，如果從公佈港股通的流入數字，差唔多有過千億元，呢啲資金其實投資好規範，皆因佢哋入場門檻有限制，小散戶基本上不能進場，再者港股通可以買嘅股有規定，所以資金炒乜有路捉，而且呢啲錢會較長期留在香港，唔會一落嚟就走。
陸羽仁
金融High Tea 舊文
來源 source: http://hdfin.stheadline.com
