財路：高陽吼再插兜一轉
■內地智能手機普及，支付模式改變，對高陽主打瓣數有利。互聯網圖片
高陽（818）食住第移動支付大趨勢，嚟緊日子，keep住掂當，明年預測PE得番6倍，再插兜轉。高陽主打支付交易處理方案、金融解決方案，信息安全芯片同解決方案。
啱上年尾，高陽發上年度業績訊息，話自家
主打交易處理方案，喺上年頭十一個月營收同比大幅增加，加埋出售附屬公司，經營溢利會大增，但旗下聯營百富環球（327）上年度業績會倒退40%到50%。
咁睇，據統計，到上年尾，內地網民規模達7.7億，手機網民7.5億，而透過手機支付比例，亦由2016年50.3%，增加到65.5%。又上年全年，銀聯網轉接交易金額達到93.9億元人仔，同比增加近29%。睇到係，智能手機普及，支付模式改變，對高陽主打瓣數有利。
又高陽喺上年中，累計國內活躍商戶總數達到200萬戶，交易額累計超過4,500億人元。集團兼順利通過人行各項審核，成功攞到銀行卡收單、互聯網支付及移動支付牌照續展。高陽食正財路，有運行，兼抵銷聯營潛存閃失。
場內專業預測，高陽就快派2017年成績單，EPS0.14元，今年同明年再增長到0.17元同0.21元，預測PE9.4倍、7.7倍同6.2倍。高陽由上年9月兩蚊邊位，跌咗近40%，現價1.4元，總市值得38.8億元，集團到上年6月尾揸淨現金近24億元，或每股0.86元，淨現金係現價61%。
又高陽呢個殘價明年預估PB得0.39倍，有盈利嘅支付瓣數當中，高陽至抵搞！高陽再跌，吼住近一年支持1.2元兜轉，中線博翻半番到1.8元，明年預測PE先得8.6倍，陰功！
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.finance.appledaily.com
