金手指：巴郡 匯控 共產黨
■畢菲特旗下巴郡出業績，千億美元值嘅現金寶山進一步膨脹，呢個係一個訊號。資料圖片
上周，股神畢菲特主持嘅巴郡出業績。呢位每年同我同一日慶生日嘅老人家，又寫咗篇水蛇春咁長嘅文。
睇佢份公告，最篤我眼，肯定係佢哋已達千億美元值嘅現金寶山，進一步膨脹。作為世上「
價值投資法」派掌門人，已係一個訊號。佢話，坐擁咁多現金，係因如果發生金融危機、海嘯、風暴等，佢哋唔使揸兜行乞，搵人救。
佢咁講，實再客氣。太客氣。睇番08年金融海嘯，大家都知囤積現金，唔係淨係為咗佢晚晚瞓得著（因公司冇槓桿，唔會被call loan）。而係當世界大亂，資產價格跌到一個七皮時，佢哋就大好時機，覓食天下。呢種終極贏硬策略，最需要就係話事人要有耐性。不過佢能夠有耐性，都要佢班幕後支持者信佢。一但冇咗長遠信佢嘅信心，就會墮落「每季跑數谷股價」嘅惡性循環。
其實，今天嘅巴郡咪就係昔日嘅匯控（005）。嗰種anti fragile，耐性、韌力，候機出擊之心兼能力。恒生銀行（011）成為旗下成員，都係咁來。不過，當匯控出業績時，傳媒焦點只係擺喺「點解冇回購」，反映匯控背後班股東，對匯控管理層冇長線嘅信心。三萬點仲迫回購，死未？
最後，習大大話要繼續冧莊。其實做兩屆要落車最好嘅地方，就係你做得唔好，捱十年啲人就有新希望。上一個做得好，你做得好，下一個做得好，亦可證明系統健全。依家十四億人齊問：「共產黨訓練新人系統係咪出咗事？咁你不如高位回購算。」
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com
